Binata

Sigurado ko nga wala pa mahuman ang patas-anay sa ihi tali nilang Mayor Tomas Osmeña ug Land Transportation Office-7 Regional Director Victor Caindec. Apan hinaot nga sa ilang paghimo niini dili masakripisyo ang publiko.

Sa miaging Lunes, nahasol kaayo ang publiko tungod kay misamot kahuot ang daan na nga problemado nga sitwasyon sa trapiko diha sa Mambaling area tungod sa nagpadayong underpass project.

Kini human gimando ni Osmeña nga dili na butangan og mga traffic enforcer ang maong dapit ug itugyan ngadto sa LTO ang pagdumala niini.

Ang gihimo ni Osmeña maoy iyang tubag sa pasiatab ni Caindec diha sa Facebook nga tudloan niya ang mayor unsaon pagpahapsay sa dagan sa trapiko uban ang hagit nga kon molampus siya moluwat ang mayor sa pwesto.

Gidawat ni Osmeña ang hagit apan wala motahan si Caindec tungod kay matud niya kinahanglang ilatid unsay mga parameters.

 Nasugamak si Caindec sa iyang pagpanghagit. Wala siya magdahom nga dawaton ni Osmeña hinungdan nga nangita siya og palusot.

Ang tinuod, wa’y maayong laki nga makasulbad sa sitwasyon karon diha sa Mambaling area. Labihan kadaghan sa sakyanan ug gamay ang karsada. Bisan pa og ibutang ang tanang traffic enforcer sa maong dapit magpabilin gihapon ang kahuot niini hangtud nga dili mahuman ang proyekto ug mabalik sa normal ang gilapdon sa karsada.

Dili ron panahon nga magbinata ang atong mga opisyal sa gobiyerno taliwala niining seryusong problema nga atong gisagubang.

Inay nga magpalabwanay mo sa inyong hambog, mas maayo nga magsabot silang Caindec ug Osmeña kon unsaon nga mamenosan ang kahuot samtang dili pa mahuman ang proyekto.

May labot sa reklamo ni Osmeña sa kalangan sa pag-release sa mga rehistro sa motorsiklo nga maoy sinugdanan sa ilang away, mas maayo tingali nga maminaw siya ni Caindec sa dili pa mag-alburoto.

Atol sa pagbisita ni Caindec sa The Freeman Conversations niadtong Martes, iyang gipasabot nga ang nakalangan niini mao ang proseso ug dili ang LTO maoy bugtong mabasol.

Gipasabot niya nga sagad sa mga rehistro nga malangay, tungod ni kay giutang ang motorsiklo ug kinahanglan pa nga moagi sa register of deeds isip kabahin sa proseso sa chattel mortgage.

Wa’y problema nga dili masulbad ug mag-estorya lang og tarong inay nga magsininghagay. Hinaot nga mosantop ni sa huna-huna nilang Osmeña ug Caindec.