Nakadaog si Mabatid

Gibasura sa hukmanan ang election protest nga gipasaka sa napildeng kandidato pagka kapitan sa Barangay Mabolo batok sa midaog nga si Kapitan Niña Mabatid.

Matud ni Judge Monalila Tecson sa Municipal Trial Court in Cities (MTCC) nga dili kompleto ang mga ebidensya nga gisuporta nila ni Daniel Francis Arguedo ug kaubanan nga namasangil nga namalit og botos gikan sa mga botante sila si Mabatid.

Si Arguedo misang-at og election protest didto sa hukmanan batok ni Mabatid kaniadtong Mayo 24, siyam ka adlaw human nga si Mabatid nga iyang kaatbang pagka kapitan, giproklamar nga mananaog.

Sila si Arguedo ug Mabatid managsama nga mga alyado ni Mayor Tomas Osmeña sa miaging eleksiyon, apan giingon nga hilom nga mihatag og paborable nga suporta si Konsehal Margot Osmeña pabor ni Arguedo.

Pagka karon, matud ni Mabatid nga independente na siya nga kapitan apan gisuportahan lang siya sa Barug Team Rama. Sa duha ka pahina nga “order” ni Judge Tecson, ang hukmanan nagkanayon nga walay basehanan ang gisang-at nga protesta ni Arguedo.

Sa ato pa, pabor kang Mabatid ang desisyon sa kaso. Apan karon, may lain na usab nga kaso nga gipasaka batok kang Mabatid, naglambigit kini og Quo Warranto.

Mora’g natan-aw nako nga misamot na hinoon og kasikat niini si Mabatid kay gikiha, unya gibasura lang sa korte. Sa hilom, nakadayeg ko ni Mabatid kay tiaw mo, pagdaog gyud niya pagka kapitan, mihatag siya og upat ka dump truck sa Mabolo.

Unya, ang Barangay Mambaling, gihatagan usab niya ug usa ka trak sa basura. Bi, kinsa man nga opisyal ang dunay susama kaniya og batasan nga andam mogasto sa kaugalingon niyang kwarta alang sa serbisyo publiko?

Daghan kaayong mga kwartahan sa mga kapitan nato dinhi sa dakbayan sa Sugbo, apan mihimo ba sila sa gihimo ni Mabatid nga mogasto sa kaugalingon.

Nasagmuyo bitaw ko nga gikontrahan na man hinoon si Mabatid ni Mayor Tomas Osmeña, nga sa pagsugod, kauban man unta sila sa politika.

* * *

Maayo unta og mausab ang hunahuna ni Mayor Osmeña ug mahukman niya nga pabalikon na lang sa Mambaling ang mga traffic enforcer sa CITOM.

Mora man gud nga sa gihimo ni Osmeña nga gipabiyaan niya sa CITOM ang Mambaling, tabla ra nga gisakripisyo niya ang katawhan kay wala ma’y LTO agents nga nagdumala sa traffic.

Ambot og duna ba’y lugar sa tibook Pilipinas nga ang LTO maoy nagdumala sa traffic, mora’g sigurado ko nga wala gyud. Ang trabaho sa LTO mao ang pag-isyu og lisensya, rehistro, ug manakop.