Paagi sa tikas?

Ang pagpili og presidente sa Association of Barangay Councils (ABC) pagadumalahon sa Department of the Interior and Local Government, ug anaa sab gani ang Commission on Elections.

Ang representante sa DILG maoy magsilbi nga chairman sa election committee, ug ang representante sa Comelec magsilbi ra nga sakop.

Sa mga election nga gidumala sa Comelec, sama sa pagpili og mga opisyal sa kagamhanan, gidili gyud ang mga tikas, sama sa pagbutang og mga marka sa balota aron kini mailhan.

May kapitan sa barangay dinhi sa dakbayan, mitug-an sa higala nako nga magsisibya kon unsaon nga mahibaw-an nga ang usa ka kapitan mibotar ba sa kandidato nga pabotohan kanila.

Mosalir gyud niini ang pinalitay kon dili mag-estrikto ang election committee nga pagadumalahon sa DILG. Ingon diay niini ang pamaagi nila.

Aron mahibaw-an nga ang usa ka kapitan mibotar gyud sa kandidato nga pabotohan kanila, kada kapitan dunay iya-iya nga “code” nga ipasuwat sa ilang balota, gawas sa ngalan sa kandidato.

Ibutang nato nga ang mga kandidato pagka ABC president mao si Renbor ug Bobby. Si Kapitan A, gihatagan og code nga ipasuwat gyud sa iyang balota nga “Renbor bagsik.” Ang ikaduha nga kapitan mosuwat na usab og “Renbor lover boy.”

Pinaagi sa code nga “baksik” ug “lover boy” mahibaw-an kon kinsa ang kapitan nga mibotar niadto. Kon walay balota nga mabasa nga code nga gihatag sa maong kapitan, nagpasabot nga ang kapitan nga nakadawat na, or sakop sa usa ka grupo, tua mibotar sa pikas. Sabtan ba?

Unsay pang-counter niini? Kinahanglan nga sa dili pa ang election, uyonan gyud nga kadtong mga balota nga gisuwatan og code, o ilhanan, dili iphon pabor sa kandidato.

Pananglit si Renbor kandidato sa ABC, nganong butangan pa man gyud og laing marka?

Unta, ingon niini ang himoon sa mga sakop sa election committee sa pagdumala nila sa ABC election karong Hulyo 30.

* * *

Tinuod ba nga mi-overtake og laing sakyanan kadtong bus didto sa Magay, Compostela ug hinungdan nga sa pag-agi niya sa pikas lane, nakadasmag na hinoon kini og tricycle?

Duha gyud intawon ka kinabuhi ang nakalas, ug laing upat ka tawo ang samaran sa mga nagsakay sa tricycle. Luoy kaayo ang mga biktima.

Buyno, bisan pa og ibutang nato nga sad-an ang bus nga giingong miagi na sa laing lane nga para na sa iyang ikasugat, mora’g angay na gyud nga estriktohon ang pagdili sa mga tricycle nga makadagan diha sa mga national highway.