Sayop si RD Sinas

Duha ka hulagway ang gipakita diha sa social media kabahin sa pagkamatay ni SPO1 Adonis Dumpit human kini napusilan sa kapolisan ug mga sakop sa National Bureau of Investigation (NBI) didto sa Bohol.

Ang ubang nakakita, apil ang pipila ka sakop sa media, mihatag og nagkasumpaki nga hunahuna kabahin sa maong hulagway. Kini ilabi na nga ang labing dakong opisyal sa kapolisan dinhi sa rehiyon wa kaayo makapasabot sa maong isyu.

Makapaduda gyud bitaw kon nganong ang usa ka hulagway may armas man duol sa tuo nga kamot ni Dumpit, unya ang usa ka hulagway wala may armas? May report man gud nga si Dumpit gipatay ra gyud ug dili tinuod nga misukol kini sa kapolisan ug NBI nga mosita unta kaniya.

Sayon ra man ni sulbaron. Kay iya man kuno sa kapolisan ang maong hulagway, pangutan-on nato ang photographer kon hain man sa duha ka hulagway niini ang unang nakuha, ang dunay armas, o ang walay armas?

Sa kapin napulo ka tuig nako nga pagka police reporter, daghan ko og kasinatian, ilabi na nga gibasa nako pag-ayo ang akong libro nga “Criminal Investigation.”

Mahimo man gud nga ang unang gikuhaan og hulagway nga ang armas diha pa sa duol sa kamot ni Dumpit, ug diha nga ang mga Scene of the Crime investigators mikuha na sa armas, giusban pag-take og hulagway sa photographer.

Sa isyu usab nga kuno ang armas ni Dumpit didto ra sa iyang U-box sa motor, mora’g lisud katuohan. Sa matang pagka polis ni Dumpit nga daghan na og napatay, ug siguradong daghan usab ang nanganti nga siya patyon, imposible nga mag-drive siya og motor nga ang armas tua ra sa U-box sa iyang motor.

Kinaiya sa usa ka polis nga ang armas anaa gyud sa ilang lawas aron nga kon kini gikinahanglan sa pagpanalipod sa ilang kaugalingon, dali ra nila kini nga magamit.

Sigurado ko nga daghan ang nakakita kon diin mahimutang ang kalibre 45 nga pistola diha nga napatay na si Dumpit. Mas motuo ko nga ang armas diha kini duol sa kamot ni Dumpit.

Sayon ra man pagsuta kon nakapabuto ba si Dumpit atol sa maong higayon pinaagi sa pagtan-aw sa resulta sa paraffin test nga gihimo sa PNP Crime Laboratory Service.

* * *

Buyno, lain pa’y ato, dili tukma ang gihimo ni Police Regional Director Debold Sinas nga mora’g gihadlok niya ang kapolisan aron dili mobisita sa haya ni Dumpit pinaagi sa pagkuha nila’g hulagway.

Palihug sir, ilibkas na ang imong kamandoan kay luoy baya nga daghang polis ang mobisita unta ni Dumpit, apan wala na lang mohimo kay nahadlok nga madudahan.