Tubag sa kalibog

Hustisya maoy singgit sa pamilya ni SPO1 Adonis Dumpit kinsa napatay atol sa operasyon sa National Bureau of Investigation ug sa Regional Intelligence Division didto sa Tagbilaran City, Bohol niadtong Miyerkules.

Wala motuo ang pamilya ni Dumpit sa pangangkon sa kapolisan ug sa NBI nga nalambigit siya sa patigayon sa drugas. Alang nila, gi-ambush si Dumpit.

Apan kon ang mga nihimo sa operasyon ang pasulti-on, usa ka “high-level drug personality” si Dumpit. Si Atty. Renan Oliva, pangulo sa NBI didto sa Bohol, miasoy sa sinugdanan sa ilang imbestigasyon batok ni Dumpit, hangtud nga nahitabo ang operasyon nga miresulta sa kamatayon niini.

Matud ni Oliva nga wala siya makatuo sa sinugdan tungod kay gikaintapan sa mga kriminal si Dumpit dinhi sa Sugbo. Apan sumala pa ni Oliva nga mismong ang mga labaw ni Dumpit didto sa Tagbilaran ug dinhi sa PRO-7 ang mikunpirmar nga siya nalambigit gyud sa negosyo sa drugas.

Base sa imbestigasyon sa NBI, si Dumpit nagsilbi nga protector ug supplier sa drugas didto sa Bohol. Pagmatuod sa ilang pasangil nga si Dumpit protektor mao ang reklamo sa laing polis nga si Jonathan Argao, hepe sa intelligence branch sa Tagbilaran City Police Office.

Si Argao giingong biktima sa pagpanghasi ni Dumpit human gibalibaran ang iyang hangyo nga paubsan ang kaso nga isang-at batok sa usa ka dinakpang durugista.

Tungod sa maong reklamo, gisugdan sa NBI ang ilang imbestigasyon hangtud nga nahitabo ang hiniusang operasyon nga miresulta sa kamatayon ni Dumpit.

Pulos nako kaila si Dumpit ug Oliva. Si Dumpit nailhan sa kadaghanan dinhi sa dakbayan sa Sugbo nga kontra sa mga kriminal. Gani nabilanggo siya tungod sa iyang pagpatay sa usa ka gipasanginlang tulisan. Wala sab ta makadungog niya nga nalambigit sa drugas dinhi sa Sugbo.

Apan sa pikas bahin, wala sab ko’y nakitang rason nganong dudahan ang pamahayag sa NBI, labi pa ni Atty. Oliva nga usa ka ligdong ug tarong nga opisyal. Ang forensic examination maoy tubag sa kalibog kon nagtug-an ba sa tinuod ang mga ahente sa NBI ug RID.

Matud nila, giunhan sila og pusil ni Dumpit. Pinaagi sa paraffin test, masuta kon tinuod ba nga nakapabuto si Dumpit og pusil atol sa giingon engkwentro.