Bida nga kontrabida

Kinsay magdahom nga ang gikaintapan sa mga kriminal kaniadto nga si SPO1 Adonis Dumpit mamatay sa usa ka operasyon nga gilusad sa iyang mga kabaro sa Philippine National Police ug National Bureau of Investigation?

Nakugang ang Sugbo diin usa ka higayon niana, gibansagan si Dumpit nga ‘super police’ tungod sa iyang walay kukahadlok nga paggukod sa mga badlongon sa katilingban. Ang magpagahigahi, menteryo gyud ang padulngan.

Gani, mao kini ang hinungdan nga nabantog ang iyang pangalan, ilabi na dihang iyang napusilan patay ang 17-anyos kaniadto nga si Ronron Go, usa ka suspetsadong tulisan.

Kini ang nakapabalhug ni Dumpit sa bilanggoan, hangtud nga nakapiyansa siya kay si Cebu City Mayor Tomas Osmeña ang mibayad sa piyansa kay suod man siya sa mayor.

Nakabalik si Dumpit sa serbisyo sa PNP ug nadestino sa Bohol, diin didto na natapos ang mabulokon niyang sugilanon sa kinabuhi, apan dili usa ka bida, kon dili, usa ka kontrabida.

Mora’g pelikula, o salida sa telebisyon nga adunay dakong twist ang estorya, nga ang bida sa sinugdanan, mahimo diay’ng kontrabida sa katapusan.

Kini ang tinuod nga makapakugang nga ending sa estorya, dili tradisyonal nga kon ang bida mamatay man sa katapusan, apan usa ka bayani. Apan si Dumpit namatay nga usa ka kontrabida.

Ang mga nahimong suod sa kinabuhi ni Dumpit, dili motuo nga siya nalambigit sa ilegal nga drugas. Apan matud sa NBI nga lehitimo ang ilang operasyon human masuta nga dili lang tigpayuhot sa gidiling drugas, kon dili, drug protector si Dumpit.

Dili man sab bastabasta lang nga mohimo og operasyon ang mga otoridad kon wala sila’y basehan. Duna pa’y lawom nga hinungdan nganong nahitumpawak si Dumpit sa bung-aw sa kaalaotan.