Kamatayon ni Dumpit

Nakugang ang tibuok dakbayan sa Sugbo kagahapon sa buntag dihang mibuto ang balita mahitungod sa kamatayon ni SPO1 Adonis Dumpit.

Nakasamot sa kakugang mao ang mga hinungdan sa iyang kamatayon.

Si Dumpit napatay sa hiniusang pwersa sa National Bureau of Investigation-Bohol District Office ug Regional Intelligence Division sa Police Regional Office-7.

Ang mga operatiba sa NBI ug RID-7 giingong mihimo og buy-bust operation batok ni Dumpit pasado alas 8 kagahapon sa buntag didto sa San Isidro District sa Tagbilaran City, Bohol.

Base sa report misukol si Dumpit hinungdan sa pinusilay nga miresulta sa iyang kamatayon.

Si Dumpit gikaintapan dinhi sa Sugbo. Giila siya nga berdugo batok sa mga kriminal tungod kay duna siya’y reputasyon nga mopatay gyud og kriminal.

 Gani, nabilanggo siya tungod sa pasangil nga iyang gipatay ang usa ka menor de edad nga gipasanginlang tulisan.

Sa hinungdan sa iyang kamatayon, napapas ang maayo niyang reputasyon.

Mibanos ron ang daotan nga imahen nga dili na bisan kanus-a niya mabawi tungod sa iyang kamatayon.

Sa kamatayon ni Dumpit, mitumaw sab ang posibleng problema ni Mayor Tomas Osmeña.

Kini tungod kay si Dumpit naila kaayo nga batabata sa mayor.

Gani si Osmeña man ang nangunay og sugat ni Dumpit ug mibayad sa iyang piyansa aron kini makagawas sa bilanggoan.

Si Osmeña gipasanginlan sab ni kanhi Justice Secretary Vitaliano Aguirre nga protektor sa drugas.

Sa nahitabo ni Dumpit sigurado ko nga banhawon sa iyang mga kontra ang pasangil, labi pa kay hapit na sab ang eleksiyon.