Oil field sa Alegria maayong sinugdanan

May pipila ka dapit sa Pilipinas nga dunay minahonon nga gas. Taudtaod na kining nasayran sa gobiyerno, pero wa lihoka kay dili man makalihok gumikan sa kakulang sa mga mahalong ekipo nga gamitonon.

Sa laktod, ang nangaging mga presidente sa Pilipinas kulang og kaikag sa paggahin og pinansiyal nga suporta alang sa maong proyekto nga dako unta kaayo’g ikatabang sa paglambo sa atong nasud nga nag-ilaid sa kalisod.

Sa tinuoray lang, sagad sa mga nangalagad sa gobiyerno, labi na sa mga kongresista ug senador, kinsa maoy tigpanday’g balaod, mao ra’y nangadato. Pero, ang kinabag-an sa pobre nga ulog-ologan lang nila’g tag P20 ngadto sa P2 mil panahon sa eleksiyon nagpabiling naghamoy sa kagutom.

Unsaon, nga sagad sa pandayong balaod sa Kongreso ug Senado pulos man pabor sa mga negosyanteng dato, wala man gyu’y para sa kabus. Busa, moresulta gyud nga inigtaas sa presyo sa gasolina, ang mga dato mosamot og kadato, samtang ang mga pobre mosamot ka musimos.

Sagad sa mga senador ug kongresista, sa hilom may kaugalingon sab nga dinagkong negosyo. Tingali, may pipila kanila nga wala. Apan nakuptan man sab og mga higanteng magpapatigayon, kinsa bigtime supporter panahon sa piniliay.

Si anhing senador Boy Herrera maoy author niadtong balaod nga nagpakatap sa daghang natukod nga private agencies sa atong nasud, kinsa maoy tigsuplay og manpower sa mga dagkong kompaniya nga gustong moiwas sa mga fringe benefits nga ikahatag sa kaugalingong empleyado. Dinhi magsugod ang contractualization. Hangtud nauso, napasagdan ug giabuso.

Ang wala’y pagpaningkamot  nga masugdan og mina ang minahonong lana sa pipila ka dapit sa Pilipinas sa nangaging namunoan sa nasud, kadudahan baya, nganong wa gyud nila kini lihoka.

Tan-awa, oh, karon nga naka-presidente ta’g pareho ni Tatay Digong, kinsa nangita’g diskarte unsaon nga mapuslan gyud nato ang lana nga nagpundo ilawom sa atong yuta.

Gisubhan dayon niya ang oil field sa lungsod sa Alegria aron masugdan na ang pag-produce og dekalidad nga gas o gasolina, diin gibanabana nga mokita’g P82 milyones kada bulan.

Nindot kining sinugdanan sa pagmina’g lana sa Alegria kay dako’g posibilidad nga kadtong mga minahonong gas sa ubang dapit, maoy isunod. Siyaro’g magpabiling pobre ang Pilipinas!