Mga pangagpas sa lana
Human sa dakong pagtibugsok sa presyo sa lana sa niaging semana (P1.20 matag litro sa gasolina ug P0.90 matag litro sa krudo), gikabalak-an nga mobalik og katkat ang presyo karong semanaha nga mahimong mosangpot sa pag-umento na sa krudo, gasolina ug ubang produkto sa Pilipinas unya sa Martes.
Kini tungod sa pangagpas (ang kalibutanong presyo sa lana gipasikad sa mga pangagpas, dili sa aktuwal nga kanihit, o kaabunda sa suplay) nga dili tugotan sa Organization of Petroleum Exporting Countries ug non-OPEC countries nga mobalik og tidlum ang presyo.
* * *
Samtang nakahukom na ang Saudi Arabia, ang pangulo sa OPEC, ug Russia, ang pangulo sa non-OPEC countries, sa pagpausbaw sa ilang produksiyon dayong pahigayon sa ilang tigum sa Vienna karong buwana, wa’y nagpaabot nga magpatuyang sa ilang gibati.
Dili na mahitabo nga magpataka og pabuhagay sa ilang produksiyon. Nakat-on sa pait nilang kasinatian karon lang gyud nga bag-o nga kon mabanhaw ang pagbaha sa kalibutanong suplay, motibugsok na sab ang presyo ug mahulga na sab ang ilang mga ekonomiya ug mahimong makapasuko na sab sa katawhan ug magprotesta batok sa ilang liderato.
* * *
Sa pikas nga bahin, nahibawo sab ang OPEC ug non-OPEC countries nga dili sila makapatuyang sa pagpaburot sa presyo sa lana pinaagi sa pagpadayon pagmugna og artipisyal nga kanihit sa suplay kay nabalaka sila nga kon mosulbong ang presyo sa lana ngadto sa $100 matag baril, o mas taas pa:
Mahimong maluya ang kalibutanong ekonomiya; nga
Makapatidlum sa kalibutanong demanda sa lana; ug busa
Motibugsok na sab sa presyo.
* * *
Nitumaw hinuon ang kataw-anan nga hiku-hiko ni US President Donald Trump sa kontrobersiya sa lana:
Iyang pagbiya sa Iran nuclear deal maoy pabilo sa pagsulbong sa presyo sa lana sa niaging mga semana; nga
Nisangpot sa pagsaka sa presyo sa gasolina sa Estados Unidos; nga
Mahimong makapasuko sa mga botante batok sa mga kandidato sa mid-term elections karong Nobiyembre nga gipaluyohan sa iyang Republican Party; ug busa
Giawhag ni Trump ang Saudi Arabia sa pagpasalamat sa iyang pagsalikway sa Iran pinaagi sa pagdugang sa ilang produksiyon og usa ka milyon ka baril sa lana matag adlaw aron mobalik og tibugsok ang presyo.
* * *
- Latest
