Padayon ang problema

Nagsugod na ang tingklase kaniadto nga Lunes. Milyones ka tinun-an sa elementarya ug sekondarya ang nagpanon sa mga nagkalain-lain nga tulonghaan sa nasud alang sa pag-abli sa bag-o nga tuig-tingtungha sa pampubliko ug pribado nga mga eskwelahan.

Sulod sa napulo ka bulan, ang classroom maoy mahimo na usab nga ikaduha nga puy-anan sa mga tinun-an. Sulod sa pipila ka bulan, ang classroom maoy magsilbi na usab nila nga galingan sa ila nga tinguha nga makakat-on og importante nga mga butang alang sa ila nga ugma.

Apan niini nga pagsugod na usab sa tingklase, padayon usab ang problema nga kasagaran nga masinati matag abli na gani sa school year. Hagbay ra kini nga mga problema ug wala gayud masulbad bisan pa sa nangagi nga mga administrasyon.

Usa niini ang problema sa kakulang sa mga magtutudlo sa pampubliko nga mga eskwelahan. Sa tibuok nasud, liboan ka magtutudlo ang gikinahanglan karon taliwala sa nagkadaghan nga mga estudiyante.

Usa sa rason ngano nga menos ang nadani sa propesyon pagka-magtutudlo mao ang kagamay sa suholan niini. Daghan karon sa mga batan-on ang naingganyo hinuon sa uban nga mga propesyon, sama diha sa sektor sa business process outsourcing diin mas dako ang sweldo.

Hinuon, niini nga administrasyon ni Rodrigo Duterte, misulbong na ang sweldo sa mga magtutudlo sa pampubliko nga tulonghaan, ug hinaot nga daghan na usab ang adunay interes sa mao nga propesyon.

Usa usab sa problema nga angay gayud hatagan og dako nga pagtagad sa gobiyerno mao ang kakulang usab sa classroom ug uban pa nga mga pasilidad nga makatabang pagpalambo sa pagtuon sa ato nga mga tinun-an.

Tungod lagi sa nagsaka nga populasyon sa mga estudiyante, dili na maako sa mga eskwelahan ang pagsulod kanila sa mga classroom.

Gani, ordinaryo na nga talan-awon ang mga klase nga ipahigayon ilalum sa mangga ug sulod sa mga sports center sa barangay tungod lagi sa dako nga kakulangon sa classroom.

Sa ako nga tan-aw, modagan pa og daghan nga katuigan una pa masulbad kini nga mga problema sa mga pampubliko nga tulonghaan. Kini gumikan usab sa kakulang sa budget nga gigahin sa kagamhanan sa Departamento sa Edukasyon matag tuig.