Nabiktima ko

Bilib gyud ko sa kawatan kay misulod sa akong balay kagahapon sa kaadlawon nga walay kahadlok human niya gipugos pag-abli ang jalousie blades ug giabli ang trangka sa pultahan.

Bana-bana namo, una nga nangukab ang kawatan sa mga cabinet diha sa among sala, ug kay na-secure man namo ang mga cellphones nga dali ra’ng mapunit, misaka ni sa second floor nga tua ang kuwarto sa akong mga bata.

Kay abli ra man ang pultahan, sayon kaayong gipangsakiyo ang mga baligya nga relo sa akong bata.

Ang akong kinamanghoran nakamatngon, og pagtan-aw niya nga ang tawo nga nagkawo, dili man namo kauban ug nagbitbit og kutsilyo, nagpatulogtulog siya.

Atol nga nakamata na ang akong bata nga Criminology aron mangandam na sa iyang pagtrabaho. Nakit-an pa gyud sa akong bata nga criminologist nga midagan ang kawatan pagkanaog.

Gisuwayan og gukod sa akong bata apan kalit lang nahanaw. Ingon sa dili gyud ko makatuo nga sak-on pag-usab og kawatan. Pastilan, karon natudloan ko og leksiyon nga kinahanglang andam gyud kita kanunay.

Kon makabasa niini kadtong kawatan, hagiton nako siya nga mobalik kay daghan pa kaayong mga butang nga iyang makawat. Pero, kinahanglan nga sa iyang pagbalik, kublan na siya. Hagit nako na niya.

Lisud na gyud tingali kaayo ang panahon karon no?

Tingali, ilabi na sa mga walay trabaho ug naglisud na pagpangita og ilang makaon, mao nga modangop na lang sa pagpangawat.

* * *

Maghisgot man gyud ta og armas, lisud na kaayo karon ang pagkuha og lisensiya kay ang imo na man nga kaugalingon maoy palisensiyahan, dayon ang armas nga imong huptan, iparehistro usab sa Firearms and Explosives Office.

Kon gusto ka nga madaladala ang armas gawas sa panimalay, kinahanglan nga lukatan kini og Permit to Carry Firearms Outside Residence (PTCFOR). Ang akong ikasulti mao nga lisud gyud tinuod ang pagkuha og pagtugot nga makatinil kita og pusil, apan kinahanglan kini nga atong himoon.

Kadtong kawatan kon ako pa’y nakasakop ug ako siyang napatay, “thank you” gyud unta siya. Ang tinuod, wala kaayo ko maalarma pagkasayod nga may nakasulod nga kawatan sa among balay, apan himoon nako kini nga leksiyon.

Tingali, sa sunod dili na makaikyas ang kawatan nga magpatugatuga pagsaka sa among balay. Dili nako siya pasayloon.

Gisuwat ko kini aron nga kon moabot na ang higayon, nasayod na kamo sa makaduha na nga gisaka og kawatan ang akong balay, ug nga gusto ko nga sa ikatulong higayon, Nobiyembre 1 na ang birthday sa kawatan.