Tinuod nga ‘kingpin’
Ang resulta sa eleksiyon niadtong Lunes, nagpakita kinsa ang tinuod nga political kingpin sa dakbayan sa Sugbo. Ang Bando Osmeña Pundok Kauswagan maoy nanghawod atol sa barangay elections dinhi sa dakbayan pinaagi sa 49 nila ka midaog nga kapitan.
Gikan sa 15 lang ka mga kaalyadong kapitan, karon mayoriya na ang BOPK sa 80 ka barangay sa dakbayan. Posibleng mas dako pa unta nga mayoriya ang nakuha sa BOPK og wa’y ayuda gikan sa kampo sa PDP-Laban ug ni Presidential Assistant Michael Dino ang ilang mga kaatbang.
Dako og natabang ang maong ayuda tungod kay nakapugong ni sa makinarya sa BOPK. Si kanhi mayor Michael Rama ug ang iyang mga alyado sa konseho miingon nga ang black propaganda sa City Hall batok sa ilang mga kandidato, misaler gyud. Tinuod, nakatabang ni pagkumbinser sa mga but-an nga botante nga dili na angayang sublian ang ilang mga kapitan nga wala makahatag og kwentada sa minilyon ka pesos nga pundo nga ilang nadawat gikan sa dakbayan.
Apan sa mga botante nga nawong og kwarta, wa’y epekto ang maong propaganda.
Lanog ang mensahe sa resulta sa eleksiyon, nga lisud banggaon ang administrasyon tungod sa iyang makinarya. Ug mao sab ni ang nahitabo niadtong niaging eleksiyon sa barangay nga si Rama pa maoy mayor. Dili ba nangharos man sab ang iyang mga kandidato niadto?
Pero wala pa mahuman ang kumbati. Kini tungod kay mosunod ang eleksiyon sa ABC president ug SK federation. Kini maoy labing importante alang ni Osmeña tungod kay ang mga mapili, mahimong ex-officio member sa konseho. Dako ang akong pagtuo nga ang 49 ka kapitan sa BOPK, madugangan pa atol sa ABC elections.
Nagtuo ko nga sa mga kapitan nga kaalyado ni Rama, dunay mobalimbing ug adto mosuporta sa manok sa BOPK karong ABC elections. Gikinahanglan ni Osmeña ang dugang kaalyado sa konseho aron molusot ang iyang gitinguhang mga proyekto, usa niini ang P18 bilyones nga development sa kanhi Kawit Island, nga kabahin na karon sa SRP.
Dako na hinuon karon ang posibilidad nga ang walo ka konsehal sa BOPK, madugangan ug duha samtang ang oposisyon maibanan og usa kon dili na masublian si konsehal Phillip Zafra isip presidente sa ABC.
* * *
- Latest
