Swertres operator nakadaog?

Naintriga gyud ko sa nadawat nako nga text messages nga nagpahibalo nga apil kuno nga midaog sa pagka opisyal sa Barangay Guadalupe ang duha ka financier og illegal swertres. Kon tinuod man gani kini, masabot ba nga gusto ra diay sa mga taga Guadalupe nga magpadayon ang ilegal nga sugal, kining gitawag og illegal swertres sa ilang barangay?

Wala pa ko makahigayon og interview ni Kapitan Michael Gacasan kabahin niining maong isyu. Kon tinuod man gani nga adunay mga opisyal sa Guadalupe nga nalambigit sa illegal swertres operation, nakaila gyud si Kap Gacasan. Napugwat ko sa akong pagkatulog dihang nitingog ang akong cellphone tungod sa nagpusot-pusot nga text messages. Gabii na kaayo kaniadtong Lunes, apan ni-reply ko sa nag-text nako ug nagpakisayod og dugang inpormasyon.

Gitug-anan ko niya, apan dili dayon ko motuo niini. Apan naintriga pa gyud ko kay matud sa texter nga kining maong opisyal, dunay koneksyon sa laing operator og illegal swertres nga nagbase sa Barangay Suba. Sa wala pa ko mosuwat niini, nakigsulti ko og polis aron magpakisayod kon tinuod ba ang nadawat nako nga report.

Sa una gud, usa ra man ka opisyal sa Guadalupe ang giingong nalambigit og illegal swertres, apan karon duha na diay? Ang amigo ko nga polis nga anaa madestino sa Cebu City Police Office mitug-an pa nako og dugang inpormasyon.

Kay Barangay Suba man kini, pakisayran nako niini ang amigo nako nga si Kapitan Jojo Sable. Nakaila gyud tingali siya niining operator og illegal swertres nga kasosyo sa usa ka opisyal sa Guadalupe. Anam-anamon lang nato ni paghisgot kay mohisgot sab ta og lain.

* * *

Kaniadtong miaging barangay elections, diha ko madestino sa Barangay Suba ug Pasil. Wala gyud hinoon mi magkakita si Kapitan Sable nga mora’g diha ra nagsige’g luklok sa iyang opisina.

May tawo nga miduol nako ug nagpaila nga siya ang magpadad-anan nako og mga report. Mihunghong siya nako nga tinuod gyud nga midagsang na pagbalik ang mga video karera ug moli-moli sa Suba.

Bi, atensiyon mga polis, daghan kuno kaayong mga video karera ug moli-moli sa Suba ug ang tag-iya usa ka “Derek” unya ang mga tatak, TM. Awhagon nako ang mga higala ko nga polis diha sa Station 6 nga nagbase sa Barangay Sawang Calero, nga aksiyoni ninyo kining maong report.

Kadto ra ba nga mga illegal gambling machines nga gipanguha sa dapit nga nasunogan sa Sitio Lawis, Pasil, gibalik ra dayon pagkaugma ug karon naa na sab. Mauwaw na lang tawon ko sa akong informer kay basin og magtuo nga wala nako tagda ang iyang gi-report.