Pakalma sa paspas nga pinitik sa kasingkasing (2)

Gawas sa pagrelaks sa hunahuna, usa usab sa maayong paagi ang pagpamalandong, o tai-chi (slowmotion dancing & breathing), sayaw kini nga pinakalma ang lihok, hunahuna ug ang pagginhawa.

* Vagal maneuver – pagpagana kini sa ‘vagus nerve’, pinaagi sa inanay nga mapugnganon sa pagginhawa ug paghingos abot ngadto sa ilawom sa atong ginhawaan ug inanay sab ibuga paggawas (slowly exhale) ang toksik nga emosyon.

Pinaagi niini nga pagsesyon, mokalma ang pinitik sa kasingkasing, nga yawe kini sa pagpagana (stimulate) sa vagus nerve’, nga monormal ang pinitik sa kasingkasing ug pakalmahon ang presyur sa dugo o hayblad, ilabi na tandogonon ka’s kabalaka.

Ania pa’y uba’ng paagi sa pagpagana sa ‘vagus nerve’-

* Maligo og bugnaw (cold water) - mahimo sab maghilam-os, o piksan og bugnaw ang nawong. O kaha, butanga’g tualya nga pinabugnawan o ‘cold compressed’ nga pakete, nga itapion, o ibutang sa ulo.

Ang kabugnaw (icecold) sa tubig, makatabang nga paganahon ang ‘vagus nerve’, nga duyogan sa pagpugong o pag-utong. Ang labing maayong posisyon nga buhaton kini, mao ang paghigda.

* Inom og bugnaw nga tubig – makatabang kini sa kauhaw o sa kakulang sa tubig ang lawas.

Usa ni sa hinungdan ngano maugtas nga mokusog ang pinitik sa kasingkasing, kay ang dugo moespiso kon way igo nga tubig palayaw sa dugo, aron kini makasirkular sa pinong kaugatan (nerves) sama sa utok ug kasingkasing.

* Buhion nga ibalanse ang ‘electrolyte’- tubig kini nga dasok sa ‘ions’ nga magsuplay og balanse nga koryente sa lawas aron pabaskogon ang sistima sa nerbiyos (nervous system) ug sa katibuk-ang panglawas nga mohimsog.

Ang ‘electrolytes’ pahimsog sab ni’s kasingkasing.