Mga remedyo sa eczema (2)

Ang eczema, sagad sab dili nato madeterminar nga maapektohan ba kita nga kinalit, o kaha laygay ba, apan dili kini makatakod nga sakita kay kon dili sab kini maatiman dayon, makahimo ni og grabe nga kahasol nato.

Tingali, dihadiha dili kita maglangan nga susihon kini, kon unsa’y mga maayo nga remedyo nga maalibyohan sa makapungot nga kakatol sa eczema. Bisan tuod matud pa, wa sa’y klaro nga mamaayo ni, apan sa hustong pagtambal niini, makontrol ang problema sa eczema.

Anaa’y daghang baligya nga tambal sa botika. Hinuon, sagad niini nagbaton og kemikals nga may say’d-epek.

Tungod niini, adunay alternatibo nga pagkontrol, o pag-alibyo sa eczema, pinaagi sa paggamit og natural nga ingrediyentes. Kini nga pambalay nga remedyo, mas nagbaton ni og katakus sa pagwagtang sa mga sintomas sa eczema. Sama niini;

* Cucumber (pepino) – ang ‘anti-inflammatory’ nga nabatonan niini, maisip kini nga usa sa labing epektibo sa eczema. Mga ingrediyents –

* 1 ka buok nga pepino nga hiniwa og nigpis ug

* Tubig. Direksyons –

* Kuhaa ang mga hiniwang pepino, dayon ibutang kini sa sudlanan nga humolan kini sa tubig sulod sa 1-2 ka oras. Unya, salaa ang tubig, inighuman i-aplay kini sa mga parte sa lawas nga apektado sa eczema.

Pasagdi nga mouga, dayon hilam-osan, o banlawan og init-init nga tubig. Buhata kini kaupat kada adlaw hangtud nga mawala ang sintomas. Panagsa, human og hiwa sa pepino, isulod sa refrigerator nga pabugnawon sulod sa 30 minutos, unya iaplay kini sa apektadong panit, nga buhaton katulo o kaupat kada adlaw.

* Oatmeals – ang  ‘anti-inflammatory’,  ‘anti-irritating’, ug ‘anti-soothing’ nga nabatonan sa oatmeal, maoy naghimo niini nga epektibo sa pag-alibyo sa eczema. Mopamenus kini nga mokalma ang pangatol ug panakit.