Imposible nga drug-free

Nindot kaayo paminawon nga aduna diay mga barangay nga drug free, o wala na’y lama sa ilegal nga drugas.

Apan posible kaha ni? Kini ang pangutana sa mga tawo nga dili dali nga pasudlon sa bulsa aron lang kalawaton ang mga kasayoran nga dili gyud katuohan. Matud pa nga 18 ka barangay sa lalawigan sa Sugbo ang girekomendar sa Cebu Provincial Anti-Drug Abuse Office, uban sa mga naglangkob sa oversight committee nga drug-free na.

Duna sila’y mga sumbanan nga makonsiderar nga drug-free na ang usa ka barangay, apan luyo niining tanan, dili kalikayan nga mahulog sa ‘katuohan dili’ nga wala na gyu’y lama sa illegal drugs ang usa ka dapit nga libre ang tanan makasulod-gawas kay dili man kinoral ang mga barangay.

Katuohan seguro kon tanang tawo nga mosulod sa barangay gipaubos sa drug test ug negatibo sa illegal drugs, apan nasayod kita nga dako kaayo kanang imposible.

Gamiton lang nato nga sanglitanan ang mga jail facility nga kinoral, adunay daghan guwardiya, naa pa gyu’y mga nakamontar nga CCTV, apan naghitak man gihapon ang ilegal nga drugas.

Ang CPDRC kapila naman na gipaubos sa greyhound operation, apan wala man gihapon nahurot ang mga kontrabando.

Mokapin lang na sa 3,000 ang populasyon sa CPDRC nga anaa sa mga hawla nga kontrolado sa mga otoridad, wala man gani na madeklarar nga drug-free?

Ang mga barangay pa kaha nga hilabihan ka luag ug wala’y mga mata sa mga otoridad nga nagbantay kanila?

Unta, kon mangandoy kita, kana na lang duol sa tinuod, dili kanang imposible kaayong kab-oton. Kitang tanan nasayod nga ang giingon nga drug-free, usa lang kana ka pantasya sa nagpasiugda.