EDITORYAL - Nadakpan sa pag-abuso

Ang usa ka traffic enforcer gisweldohan sa kagamhanan aron nga mopatuman sa mga balaod nga naglambigit sa pagpahapsay sa trapiko, mao nga salikwaot kaayo tan-awon nga ang traffic enforcer mao na hinoon ang dili motuman. Nagngisi pa ang maong traffic enforcer nga sakop sa CITOM diha nga mi-counterflow sa dalan Echavez dapit sa eskina General Maxilom Avenue sa pagtuo nga dili siya dakpon sa iyang kaubanan nga nagpahigayon og checkpoint.

Tukma kaayo ang gihimo sa CITOM special task force nga personal gyud nga gisuperbisahan sa ilang operations chief nga si Francisco “Isko” Ouano kaniadtong Martes sa hapon. Kon wala pa dakpa sa mga sakop sa CITOM ang nagpabadlong nilang kauban, sawayon sila sa daghang motorista nga nagtan-aw kanila, ug may mikuha pa og video sa mao nga operation nga ilang gihimo.

Higayon na kini ni Mayor Tomas Osmeña sa pagtudlo og leksiyon sa maong sakop sa CITOM nga miabuso ug wala motahod sa iyang kamandoan nga gipaagi sa usa ka Executive Order. Wala magkomedya ang mayor sa pag-isyu sa kamandoan nga dakpon gyud ang mga motorista ug tanggongon ang mga sakyanan kon masakpan nga mosugat sa traffic.

Ang maong traffic enforcer nga giingong 18 ka tuig na sa serbisyo, dili angay’ng papadayonon sa iyang serbisyo kay makahatag ra siya og buling sa uban niya nga mga kauban nga nagtinarong sa trabaho. Subo lang usab hunahunaon nga dihang nadakpan na ang maong traffic enforcer, dunay iyang mga kauban nga mihimo’g komentaryo nga misaway sa gihimo sa ilang mga kauban nga estriktong mipatuman sa balaod.

Sila apil nga dili angay’ng papadayonon sa serbisyo isip traffic enforcer kon masakpan nga makahimo usab og salaod. Dugay na kaayong panahon nga bati kaayo’g dungog ang CITOM tungod kay ang uban kanila, nalambigit sa pagpangilkil sa mga driver, ug ang uban giingon nga maoy “padrino” sa mga tawo nga anaa daplin sa mga karsada mangilkil sa mga motorista.