Gadgets makadaot kon pasubrahan

Mohangop ko og kausaban kay kini ra maoy permanente nga butang dinhi sa kalibutan. Apan isip usa ka educator, usa ka Sugboanon, lumolupyo dinhi sa kalibutan ug isip anak sa Ginoo, hangpon nako ang kausaban basta alang kini sa kaayohan, ug dili kay makaguba sa napundar na nga maayong pamatasan sa atong mga ginikanan.

Akong lauman nga unta makatampo ko pinaagi niining lindog aron ang mga ginikanan makalingi pagbalik sa ilang kagahapon, kon giunsa sila pagpadako sa ilang mga ginikanan nga maoy nakapahimo kanila nga responsable nga pagkatawo ug wala mahimong badlongon sa katilingban, ug ilabi na ang pagtudlo kanila sa paghigugmaay sa tibuok pamilya.

Ang lindog nato sa miaging Domingo, naghisgot nga tungod sa pagtumaw karon sa mga electronics gadgets nga gikalingawan pag-ayo sa kabatan-onan ug apil na ang mga ginikanan, gikalimtan na lang ang panagsuod sa pamilya diha sa panimalay ug halos dili na gani magtagdanay kay matag usa kanila nalingaw sa electronics gadgets.

Ang modernong electronics gadgets makatabang kaayo kanato kon dili lang usab palab-anan nga bisan og anaa na kita sa tagsa-tagsa nato ka panimalay, nga mao ra unta ang higayon nga magkasultihanay ang matag sakop sa pamilya, apan electronics gadgets lang gihapon ang gipasuwabi.

Kon kining mao nga mga kinaiya karon sa kabatan-onan magpadayon, nahadlok ako nga moabot ang higayon nga kadtong mga maayong pamatasan nga gitudlo kanato sa atong katiguwangan, hingpit na gayud nga ibanlas sa makusog nga sulog sa wala’y pagpakabana.

Ibalik nato pagtudlo sa atong kabataan ang maayong pamatasan nga gitisok sa atong mga ginikanan, sama sa pag-amen ug pagpangayo’g katahuran kon moabot na ang oracion, ug mag-ampo sa dili pa magdungan sa pagpanihapon, ug ang pagpangayo’g katahuran kon makasugat sila og mga tawo nga bisan dili nila kaila.

Angay nato nga hinumdoman nga isip usa ka sakop sa katilingban, mahinungdanon kaayo ang usa ka buotang pamilya, nga usa ka elemento sa pagpalambo sa atong nasud.

Dili unta makalimtan sa mga batan-on ang   pagminahalay sa usa’g-usa. “Papa + Mama + I- Love You = Family.” Dili ba tinuod?