Mahimong mosamot kaapiki
Bisan sa iyang pag-insistir nga wa siya mahasol sa kaso nga iyang giatubang sa International Criminal Court (ICC), kay gawas nga wa’y klarong mga ebidensiya, wa pa gyu’y hurisdiksiyon ang ICC niya, ang agresibo nga panagang ni Presidente Rodrigo Duterte mahimo nga mopahimutang hinuon niya sa mas lawom nga gahong.
Nipasidaan sila si Kongresista Gary Alejano sa Magdalo Party-List ug kanhi Kongresista Erin Tañada sa Liberal Party (LP) nga nagkadungan pagtambong sa Arangkada sa DYAB Abante Pa, Bisaya! gahapon sa buntag, nga mahimo hinuon nga mas mopaspas ang lihok sa imbestigasyon sa ICC batok ni Duterte.
* * *
Gitataw ni Tañada nga dili pa gani mapakisama sa preliminary investigation sa piskaliya dinhi sa ato ang gihimo sa ICC kay wa man pangayoi og tubag si Presidente Duterte.
Nipasabot si Tañada nga pasiuna pa kini nga pakisusi sa ICC sa mga panghitabo sa Pilipinas atubangan sa pasangil sa laktud nga pagpamatay sa kampanya batok sa drugas.
Mao nga nitambag si Alejano nga dili pa gyud unta angay’ng mangisog ang presidente. Labaw na nga wa unta kinahanglana ang pagpanghudlat nga iyang ipadakop si Chief Prosecutor Fatou Bensouda sa ICC.
* * *
Gidasonan nila ni Alejano ug Tanada ang pasidaan sa Sugboanon nga international human rights lawyer nga si Ruben Carranza Jr. nga may hurisdiksiyon ang ICC sa mga pagpanghudlat batok sa mga opisyal sa ICC aron nga dili makatuman sa ilang trabaho.
Matud ni Tanada mahimong madugangan hinuon ang orihinal nga kaso nga giatubang ni Duterte sa ICC. Nipasidaan si Alejano nga mahimo gani nga mapugos na ang ICC sa pagpadakop dayon ni Duterte.
* * *
Nahibulong si Tanada kon nganong wa makatambag ni Presidente Duterte ang iyang tigpamaba nga si Harry Roque, kinsa nangangkon nga mao ra’y abogado sa Pilipinas nga may lisensiya sa pagbarug sa mga kaso sa ICC, sa tukmang mga lagda sa kalibutanong hukmanan.
Gidasonan ni Alejano ang pasidaan sa napriso nga si Senador Leila de Lima nga kon paundayonan ang presidente, wa nay kalainan ang Pilipinas sa rogue states nga gitunglo sa international community.
Matud ni Alejano, dili mangiyugpos lang ang United Nations ug ubang kalibutanong kahugpongan sa kampanya nga gilusad ni Presidente Duterte pag-awhag sa ubang kanasuran sa paggawas sa ICC.
* * *
- Latest
