EDITORYAL - Tumoy ra sa dila

Tungod sa taudtaud gyud nga katuigan nga gipasagdan ra sa mga opisyal sa kagamhanan ang atong mga aseras ug daplin sa mga karsada, giukopar kini sa mga mapahimuslanon sa higayon nga mitukod og mga estraktura, hinungdan nga dili na kini magamit pa sa publiko. Swerte kay dinhi sa dakbayan sa Sugbo, agresibo kaayo ang pangulo sa clearing team sa Cebu City Hall nga manghawan sa mga aseras, apan dili gyud hinoon susama sa gihimo kaniadto ni Bayani Fernando didto sa Metro Manila.

Halos tanang dapit dinhi sa dakbayan sa Sugbo makita nga ang aseras gamay na lang kaayo, ug ang uban gyud gani nga karsada wala na’y aseras kay nahimo na man kini nga kabahin sa kabalayan. Tungod niini, ang katawhan anha na molakaw sa karsada nga agianan lang unta sa mga sakyanan ug nakadugang kini sa problema sa trapiko. Si Raquel Arce nga maoy nangulo sa Prevention Restoration Order and Beautification Enhancement (PROBE), ang clearing team sa City Hall, takus kaayo nga motuman sa tahas kon mandoan lang siya ni Mayor Tomas Osmeña nga panggub-on ang nakababag diha sa aseras.

Apan daghan ang nagtuo nga karong panahona wa’y kaisog ang mga politiko sa pagmando og estrikto nga pagpatuman sa balaod tungod kay nagsingabot man ang eleksiyon karong sunod tuig, ug ang mga mayor magpapili man pagbalik sa katungdanan. Ania dinhi ang problema kay tungod sa kahadlok sa mga mayor nga dili sila makadaog, mokalma sila sa pagpatuman sa balaod. Bahala na og magkayamukat ang dapit nga ilang gidumala, basta nga magpabilin silang humot ngadto sa mga botante nga maoy ilhon nila nga agawon atol sa eleksiyon.

Hilas kaayong pamation nga human sa ilang kadaogan, manumpa sila sa ilang katungdanan ug moingon nga andam silang motuman ug mopatuman sa tanang balaod, apan anaa ra diay sa tumoy sa ilang mga dila.