Wat a koneksyon

Sa 51 ka pahina nga resolution nga may petsa nga Disyembre 20, 2017, apan niadtong Lunes lang gipagawas, gi-dismiss sa Department of Justice ang kaso nga gipasaka batok sa dagkong personalidad nga matud pa nalambigit sa negosyo sa gidili nga drugas tungod sa kakuwang og mga ebidensiya batok kanila.

Gi-dismiss sa DOJ ang kaso batok kanila ni magpapatigayon Peter Lim, Kerwin Espinosa, konbiktadong drug lord nga si Peter Co, Max Miro, supplier og drugas nga si Lovely Impal, Rule Malindangan, Jun Pepito, ug uban pa nga nailhan lang sa mga alyas nga Jermy, Ricky, Warren, Tupie, Jojo, Jaime, Yawa, Lapi, Royroy, Marlon ug Bay. Wat a koneksyon.

Sa Senate hearing, si Kerwin mitug-an nga duna siya’y kasosyo sa negosyo sa ilegal nga drugas nga ang ngalan Peter Lim. Pag-dismiss sa kaso sa mga akusado, ang DOJ mipasabot nga ang mga ahensiya sa gobiyerno nga gitahasan sa pagpatuman sa balaod, kinahanglan nga manghipos og lig-ong ebidensiya nga makapamatuod sa pasangil ug likayan ang pagpasaka og kaso nga gibase lang sa self-serving nga ebidensiya.

Si Kerwin Espinosa miangkon nga nagpayuhot og shabu, ug ang iyang supply sa druga gikan ni Lovely Impal, Peter Lim ug Jaguar. Si Kerwin usab ang mitug-an nga gipangayoan siya og P8 milyones ni kanhi justice secretary ug sa napriso nga si Senador Leila Delima.

Apan lugak kuno ang ebidensya batok ni Kerwin ug mga supplier niya og gidili nga druga mao nga gi-dismiss ang kaso sa national prosecution sa Department of Justice. Miangkon na, giabsuwelto pa? Wat a koneksyon.

Bisan pa diay og moangkon ka sa salaod ug krimen nga imong gihimo ug ang imong pag-angkon boluntaryo, dili pinugos ug dili pinaagi sa hulga, maabsuwelto pa gyud diay ka kay lugak ang ebidensiya sa imo mismong pag-angkon? Talagsaon ug kini nahitabo only in the Philippines.