Pagdakila sa mga makata

Noon ako’y bumibigkas mga tulang hindi akin

pagka’t ako ay bata pa at ang diwa’y musmos pa rin;

sa utos ng mga guro mga tulang bibigkasin

pumili ng mga tula sa aklat na magagaling!

Mga tula ni Balagtas, ni De Jesus at Karasig

sa aklat na piling-pili sinaulo’t pinilantik;

sa tinig na taas baba inayos bawat himig

at saka sa entablado sinanay ang kilos tindig!

Mga guro ay natuwa isinali sa bigkasan

nang makitang sa pagbigkas ay pwede nang mailaban;

sa bawa’t paglaban ang nakamit ay tagumpay

kaya noo’y kinilalang mambibigkas na pambayan

Sa maraming baya’t lungsod ako’y laging nagwawagi

sa pagbigkas ng tulaing hindi akin at sinipi;

sa unit meet, provincial meet pangalan ko’y napatangi

at sa aking paaralan panalo ang laging uwi!

Palibhasa’y gumugulang ang edad ko sa pagtula

sinikap ko na magsulat at bumigkas na nang kusa;

kaya minsa’y sinikap kong sa tanghala’y pumagitna

aba’y pwede naman palang bumigkas ng aking tula!

Kaya ngayo’y heto ako’t sa maraming pagtitipon

bumibigkas na ng tula sa pagtaas na ng telon;

musikero’t mang-aawit kasabay kong nagkakampiyon

pag humarap na sa bayang taguyod ay kompetisyon!

Subali’t ang aking dunong sa pagbigkas ng tulain

ay di tulad ng makatang nabantog sa bayan natin;

sa ngayon ay limitado ang puso ko at damdamin

sa dunong na angkin noon ng makatang magagaling!

Si Balagtas, Huseng Batute, Karasig, Caravana

at ng ibang magagaling na makatang pumanaw na;

noong sila’y nabubuhay ay magagaling ng talaga

ay hindi hangad higtan pagka’t sila ay wala na!

Ang dalangin ko na lamang silang lahat dakilain;

at sa aking mga tula buhay nila ay dalitin

di ko sila makakayang sa pagtula ay talunin

pagka’t sila’y mga henyong sa bansa ay yaman natin!