EDITORYAL - Paghasol sa manimba

Ang kaparian sa Basilica Minore del Santo Niño mipatuman og mga pamaagi aron dili magkaguliyang ang mga tawo nga mosulod sa simbahan. Gipatuman nila nga adunay “entrance” nga adto ra gyud moagi ang mga manimba, ug may “exit” aron adto usab sila mogawas.

Wala’y lalis nga nindot ang mao nga sistema kay gitumong kini aron dili magsugat-sugat ang mga tawo nga mosulod, ug kadtong mogawas gikan sa simbahan. Apan ang gireklamo sa mga tawo mao ang sistema nga gipatuman sa kapolisan nga nakapahasol kaayo sa mga manimba. Ang kapolisan, migamit og puthaw nga barandilya nga iya sa kagamhanan sa dakbayan sa Sugbo, ug gibabag kini nila sa karsada nga aron kadtong mopaingon sa simbahan, molakaw gyud og layo, agi sa tuyoon na kaayong karsada paingon sa gihimong entrance sa simbahan.

Diha nga mibunok ang uwan kaniadtong Martes sa hapon, ang katawhan nga miagi sa layo na kaayong karsada, napugos sa pag-ubog sa tubig nga milanap na sa karsada aron lang gyud sila makaabot sa entrance habig sa Cebu City Hall; didto sa P. Burgos likud sa altar sa Basilica. Kadtong mga gikan sa Colon ug duol na unta kaayo sa laing entrance diha sa D. Jakosalem, gipalakaw pa gyud nila subay sa F. Gonzales Street aron lang nga moliko sa Magallanes ug mobalik sa D. Jakosalem ug makasulod sa entrance.

Ingon sa nawad-an na sa maayong pangisip ang mga nagpasiugda niining mao nga kalihukan kay imbes nga kahapsay ang ilang gitinguha, nataligam-an nila nga gihasul-hasol na nila ang mga tawo nga miadto aron lang gyud sa pagsimba.

Dunay tawo nga nagbantay sa “exit” sa eskina Legaspi ug D. Jakosalem Streets, tingali nabag-ohan sa katungdanan, kay bisan ang maluyahon nga tiguwang nga mihangyo nga anha lang siya moagi kay sakripisyo na kaayo ang paglakaw sa tuyoon nga rota, gipangitaan pa og ID sa senior citizens bisan klaro na ang iyang pagkatiguwang.

Unta, hinuktokan kini sa mga opisyal ang ilang paghasul-hasol sa mga nanimba.