Brgy Kalunasan, Cebu City
“Ipa-raid namo sa mga polis kining pasugalan diri, sama sa tong-its ug mahjong, kay saba kaayo ilabi na panahon sa gabii. Halos dili kami makatulog sa ilang kasaba.”
Brgy Sabang, Danao City
“Dia’y nagpatanto diri sa among lugar nga grabe kaayo ka estrikta. Kon dili ka makabayad dayon sa “due date” moderetso man dayon siya’g polis kay maoy iyang pasukton.”
Brgy Basak-San Nicolas, Cebu City
“Manghinaot kami nga mahuman na intawon ang drainage system diri sa among lugar kay luoy na kaayo ang mga nagpuyo nga mura g’yud og dagat kon kusog ang uwan. Mga trabahante ug tinun-an maapektohan kanunay ang ilang trabaho ug klase.”
Brgy Bonbon, Oslob, Cebu
“Ang among mga opisyal sa barangay wala man g’yud magpakabana bahin sa problema namo bahin sa pundir nga suga sa poste.Ngitngit kaayo ang agianan ug kuyaw sa disgrasya o ba kaha binuangan ang maglakaw kay ngitngit man.”
Brgy Bancasan, San Remigio, Cebu
“May silingan mi diri sa Sitio Kamansiles nga namuhi og baboy, baho kaayo ug kuyaw sa sakit, labi na sa mga bata. Maayo unta’g mabadlong kini siya kay ang iyang tangkal naa ra g’yud duol sa among mga balay.”
Brgy Linao, Talisay City
“Dia man gihapo’y namaligya og shabu diri sa among lugar, ilabi na diha sa grahean sa mga taxi. Dali ra na nga mailhan kon asa ang balay sa pusher kay naa may daghang tawo nga mag- anhaan.”
Brgy Kansi, Tuburan, Cebu
“Ngano kaha nga gipangpili ra man nila ang mga tiguwang nga ipasakop sa OSCA diri sa among lugar nga mahatagan nila og senior citizen’s financial assistance? Dili ba naa may balaod nga ang tanang senior citizens makadawat g’yud og hinabang?”
Brgy Mambaling, Cebu City
“Kining among lugar sa Puntod-ABBYA, Alaska gi-reblock ni human sa sunog kaniadto para naa’y karsada nga malutsan ang mga sakyanan, labi na sa fire trucks, pero karon kay giparkingan na man hinoon og multicab ang karsada unya anha pa g’yud magluto og sago.”
Brgy Luyang, Carmen, Cebu
“Kining dalan namo diri sa Sitio Malbago kay pwerte na man lang g’yud nga gubaa, luoy kaayo ang mga motorista nga moagi diri sa among lugar. Lawom na kaayo ang mga libaong, pero wala may nagpakabana nga mga opisyal namo sa barangay ug sa lungsod.”
Brgy Tayud, Liloan, Cebu
“Wala na man g’yud kuhaa ang mga basura diri sa Kapulay, baho na g’yud kaayo diri. Dugay na kaayo kini namo nga problema, pero wala may gihimong aksyon ang mga opisyal sa barangay.”
Alang sa inyong mga reklamo, text lang sa 09083006702 / 00953598138
- Latest
