Brgy Bateria, Daan-Bantayan, Cebu

Kusog man gihapon ang pamaligya’g shabu diri sa among lugar, labi na sa Sitio Camaras ug Sitio Matan-ag. Wala’y hubas-hubas ang ilegal nga drugas. Kinsa may makasumpo niining problema namo diri sa shabu, kay ang mga polis karon diri wa’y gihimong aksyon.

Brgy Pusok, Lapu-Lapu City

Diri sa Sitio Semento, naa mi silingan nga ang iyang drainage wa’y klaro kay magsige lang og awas, unya maghitak lang pirmi bisan og wa’y ulan, ari padulong sa among mga balay. Amo naman unta kining gireklamo sa among mga opisyal sa barangay pero wa may aksyon.

Brgy Pajo, Lapu-Lapu City

Concern lang ko diri sa Seaside kay ang among mga barangay opisyal diri manago man kon dunay ipadangat nga reklamo. Magsige ra man og balibad ang mga tawo nga gibilin sa barangay hall, wa’y opisyal nga mo-duty.

Brgy Ticad, Bantayan, Cebu

Naunsa naman kining taga BANELCO nga dili man maayo moserbisyo sa ilang mga konsumidor, labi na kon may ipadangat kami nga problema bahin sa ilang wa’y ayo nga serbisyo. Magsige mi og text, pero wala g’yuy reply.

Brgy Tuyan, City Of Naga

Diri sa Sitio Yuso kay naay nagpahigayon og illegal tapping sa kuryente post No. 0955375. Dugay na kaayo kini nga gihimo nila, pero wala g’yud matagad sa taga VECO. Kuyawan ang mga tawo diri sa sunog.

Brgy Sab-A, San Remigio, Cebu

Nagkagrabe na g’yud ang sugal diri sa among lugar, labi na g’yud sa Sitio Mendoza kay hapit magbuntagay ang mga sugarol. Ang luoy kaayo kay kanang tigpanghatag sa financial assistance sa 4P’s, inighuman og kobra adto dayon sa sugalan.

Brgy Canjulao, Lapu-Lapu City

Imbes nga momenos, nagkagrabe naman hinoon ang problema sa illegal drugs, labi na sa mamaligyaay diri sa Sitio Caimito. Susihon unta kini sa kapolisan, labi na kanang usa ka apartment diha.

Brgy Mantalongon, Dalaguete, Cebu

Paeta sab niining among mga opisyal diri uy, wala man g’yud mohimo’g aksyon sa problema sa gubaon nga karsada padulong sa simbahan. Kuyawan intawon ang mga pasahero basin naay malintuwad nga mga tricyle nga ilang masakyan.

Brgy Sirao, Cebu City

Ang taga city engineering diri sa siyudad kay palaum kaayo, igo ra mitan-aw sa problema namo sa karsada nga dili maagian og sakyanan, apan hangtod karon wala man mobalik, sige lang pasalig nga ila na kunong trabahoon.

Brgy Kangdampas, Barili, Cebu

Maayo unta og makabasa niini ang among kapitan kay wala man g’yud siya magtagad sa problema sa karsada  nga lisud maagian og sakyanan, labi na kon magsige’g uwan. Ang among gikabalak-an kon dunay emergency sa pasyente, kuyaw nga matiwas nalang kay bati man ang karsada.

Alang sa inyong mga reklamo text lang sa 09083006702