Ganti sa kaligdong
May inilang abogado kansang lapad nga kinaadman ug talagsaong katakus sa balaod gitugbangan sa dako nga buslot: Dili siya mangahas pagpanalipod sa iyang mga kliyente nga sa iyang tan-aw sad-an.
Gibuyag ug gibugal-bugalan sa iyang kaubanang mga abogado ug mga huwes. Apan lig-on ang iyang baruganan.
Iyang mga kliyente nahibawo nga kun pabor nila ang balaod, bisan unsa pa kadako ug kagamhanan ang ilang kaatbang, seguro silang modaog; apan kun sila’y sayop dili na sila angay’ng mag-usik sa panahon sa pagdangop ug pagpalaban niya.
* * *
Sa usa niya ka kaso, gipasanginlan ang iyang kliyente nga nangawat. Niduol siya sa huwes nga iyang giingnan: “Kun may maayo kang masulti mahitungod sa akong kliyente, himoa na. Dili ko. Kun mosuway ko pagpanalipod niya, mabantang nga siya sad-an, ug makonbikto siya.”
Mahimong pugson sa mga huwes ang mga abogado sa pagdawat sa mga kaso, labi na kun wa’y laing makarepresentar sa kabus nga mga kliyente ug nga mosangpot sa kalangay sa mga husay. Apan dili sila mapugos pagpamakak alang sa ilang mga kliyente.
* * *
Sa husay sa lain niyang kasong kriminal, ang abogado nihunghong sa iyang kaubang abogado: “Sad-an ning akong kliyente, palihug panalipdi siya. Dili ko.” Gihangop sa iyang kauban ang kaso tungod sa kadako sa bayad.
Nakaangkon og daghang pagdayeg ang abogado. Apan ang pagdumili pagdawat sa pipila ka kaso gisakyan sa iyang mga kaatbang dihang nisulod siya sa politika nga mga ebidensiya sa iyang kahuyang paghimo og lisud nga politikanhong mga desisyon.
* * *
Tuod man, napilde siya sa unang mga pagsuway pagdagan sa lokal ug nasudnong mga katungdanan kay nagdumili sa pagpamakak sa iyang kampanya sa lokal nga piniliay ug nisuporta sa iyang kaatbang nga sama niya og baruganan apan gituohang mas dako og kahigayonan nga modaog sa nasudnong piniliay.
Nabangkarota pa gyud ang iyang negosyo ug nakasunod og dakong utang tungod sa pag-insistir pagtuman sa mga lagda.
Ang tarung nga abogado, pilderong politiko ug nabangkarotang negosyante, nga naapil sa libro nga “Give and Take” ni Adam Grant, nga nimatuod nga ang kaligdong ug kamanggihatagon maoy labing maayong mga puhonan sa kalampusan, mao si Abraham Lincoln, ang ika-16 nga presidente sa Estados Unidos (1809-1865).
* * *
- Latest
