Lobby money, dunay nakasapi?

Niining pagsalikway sa Commission on Appointment (CA) pagtudlo ni Gina Lopez pagka-kalihim sa Department of Environment and Natural Resources (DENR), si Presidente Digong Duterte, nagkanayon: “Sayang si Gina. I like her passion. Lobby money talks.”

Kun dunay lobby money, duna’y nakasapi. Kinsa man? Of course, wala’y moangkon, ug imposible kining kapamatud-an. Bisan si Duterte mismo igo lang tingali nga nag-speculate.

Atong higala, Bobit Avila sa The Freeman, nagkanayon: “Gina Lopez stepped on too many powerful toes.” Literally, sa iyang pagpanalipod sa kinaiyahan, si Gina nakatunob og  gamhanan kaayong mga tiil. Gamhanan, sa ato pa, daghan kaayo og kuwarta.

Mao tingali kini ang hinungdan nga sa pagtunob ug pagyatak niya’g gamhanan nga mga tiil, giisip siya nga dili qualified sa position pagka-DENR secretary.

Sa iyang bahin, si Joel Tabora, presidente sa Ateneo de Davao, suod ni Duterte, nagkanayon: The rejection of Lopez is a great disservice to the nation. This is a national disaster. The CA has betrayed the environment and the nation. It is amazing that the CA rejected one of the greatest environmentalists of our day to lead the DENR.”

Bisan si Justice Secretary Vitaliano Aguirre nasayangan sa pag-reject sa appointment ni Lopez. “I am saddened because it is very rare to have someone with such advocacy and focus in her job. Sayang talaga.”

Ang nahibudngan sa mga political observer mahitungod ning maong issue, mao nga ang taga-opposition na hinoon ang misanong pagtudlo ni Duterte ni Lopez, samtang ang iyang mga kaalyado, sa Senado ug sa Lower House mao na hinooy misupak. Ngano man ni?

* * *

Daghan kaayong mga sakyanan, mga private cars nga nagdagan karon dinhi sa atong dakbayan ug lalawigan nga ang mga plaka adunay marka nga NCR. Sa ato pa, didto mapalit ug marehistro ang maong mga sakyanan sa kaulohan. Ngano man? Dili ba hasol man kaayo kun adto ka mamalit sa kaulohan?

Sa atong nasayran, mas barato kuno ang mga sakyanan sa Manila kay sa dinhi sa ato, bisan pag moplite pa sa  barko (freight). Ngano man ni?

Matud pa, kini tungod kay gi-monopoliya ang automotive dealership dinhi sa ato, sa ato pa, wala’y kompetensiya, samtang didto sa Manila, daghan kaayong mga dealer, nagkompetensiyahay.

Dunay brand dinhi sa awto nga gi-solo ang dealership sa usa lang ka banay. Busa, makapatuyang sila sa prisyo.

Hinaut nga masudlan kita dinhi og dugang mga dealer sa sakyanan aron makatumbas usab kita sa mga prisyo sa Manila.