Wa’y gibilin nga last will

Dear Atty. Divine,

Duna ko’y pangutana labot sa kabilin sa namatay nakong iyaan nga wala’y anak. May kabtangan siya nga gibilin, basakan, farm land ug house and lot. Kay wa man maminyo ang akong iyaan, didto ko niya gipapuyo sa iyang balay ug ako isip pag-umangkon maoy nag-atiman kaniya hangtod nga siya namatay niadtong miaging tuig. Duha ra mi ka pag-umangkon niya ug ang usa tua magpuyo sa Mindanao. Sa wa pa namatay ang akong iyaan, iyang gitugon nako nga ang iyang house and lot, iya gyud nga ihatag nako. Samtang ang farm land ug basakan magtunga kuno mi sa iyang usa ka pag-umangkon kay duha ra man mi nga pag-umangkon niya nga iyang relatives,  kay ang iyang mga igsuon nangamatay na man sab. Ang akong pangutana, mahimo ba nako nga maangkon ang house and lot, base sa tugon sa akong iyaan? Daghang salamat. — Rhea

 Dear Rhea,

Base sa atong Civil Code sa Article 804 to 809, kini naglatid sa mga lagda sa paghimo og Last Will and Testament, ug kini nagkanayon nga ang tugon o Last Will and Testament kinahanglan gyud nga in-writing, pirmado sa testator ug sa iyang tulo ka mga testigo ug kinahanglan nga notarized.

Kun Holographic Will kinahanglan sab kini nga sinuwat sa kamot sa testator, pirmado niya ug adunay petsa. Sa kaso sa imong iyaan nga verbal lang ang iyang tugon dili kini balido, ug dili kini nimo mapugos sa pagpatuman. Busa nahulog nga namatay ang imong iyaan nga wa’y gibilin nga Last Will. Busa kun duha na lang mo ka paryente ang nahibilin, kamong duha ang magbahin in equal share sa kabilin sa imong iyaan.

Hinuon, mahimo nimong suwayan sa paghangyo ang usa ka pag-umangkon sa imong iyaan kun mosugot ba siya nga ang house and lot maoy imong maangkon. Kun mosugot siya, then wa’y problema apan, kun mosupak siya, dili gyud ka kapugos sa pagpatuman sa unsa’y imong gusto. Thanks and God Bless. — Atty. Divine