Maayong mobali

Maayo gyud modala og isyu si Mayor Tomas Osmeña.

Sa usa ka insidente niadtong miaging Sabado sa usa ka dakong hotel sa siyudad sa Sugbo, si Mayor Jose Esgana sa Sta. Fe mipasangil nga gihulga siya ni Mayor Osmeña.

Una nga nahitabo, si Esgana ug ang negosyanteng si Alex Tan ang nag-atubang. Nagkalalis sila, apan gipalit ni Tomas ang away.

Apan sa pamantalaan, si Esgana na hinoon ang giingnan ni Tomas nga “bully.” Kinsa’y gipasanginlan nga nanghulga mao na hinuo’y “bully.”

 Ang nag-una niining termino nga “bully” mao si Presidential Assistant for the Visayas Mike Dino. Iyang gihinganlan si Tomas og “bully” kay nanggukod sa BDO ug SM.

Sa presscon niadtong miaging adlaw, si Esgana nagkanayon nga posibleng iyang ipaimbestigar si Alex Tan sa Bureau of Internal Revenue. Kun mao kini, ang amigo ni Tomas mao-mao ra usab diay sa BDO? Pangutana lang ning ako.

* * *

Mangulo si Senador Alan Peter Cayetano sa delegasyon aron maoy morepresentar sa Pilipinas didto sa United Nations sa Switzerland aron tubagon ang mga pasangil batok kang Presidente Rodrigo Duterte kalabot sa extra-judicial killing.

Mas maayo gyud nga tubagon kining maong mga pasangil batok kang Duterte. Klaro man nga “misinformed” ang UN ug ubang mga kalibutanong mga buhatan kalabot sa mga patay nga nahitabo sa Pilipinas tungod sa gubat batok drugas sa presidente.

Wala hinuoy laing napasanginlan sa misinformation gawas sa mga sakop sa Liberal Party. Mao kini ang nakadaut sa Pilipinas. Kun ang usa ka partido mailisan na gani sa gahum, ang mga sakop niini mura’g mga buang, bisan unsa nala’y buhaton aron dauton ang kasamtangang administrasyon.

Ngano nga dili na lang mopuyo, mokooperar, ug mutabang sa kasamtangang administrasyon aron makapamundo sa sunod sa eleksiyon? Kahibalo na hinuon ko sa tubag ning pangutanaha: tungod sa kahakog sa gahum ug salapi!

* * *

Nagsugod na pagkuwenta og balik sa mga balota ang Commission on Elections nunot sa electoral protest nga gisang-at ni Mike Rama batok kang Mayor Tomas Osmeña.

Gidungog sa kampo ni Mike nga isunod nila ang “recall election” batok kang Tomas. Pero kun ako si Mike, maayong magpuyo na lang siya.

Unsa pa may iyang ikasukol nga wala na gani siya’y gahum sa konseho, iyang mga kapitan mi-uk-ok na, ug mibalik ang kagamhanan ni Tomas. Kun mapilde og balik si Mike, unsa man?

Maghatag lang hinoon siya og dugang bala kang Tomas pinaagi sa paghatag og PR material pag-ingon nga “wa na’y tawo si Mike, ug siya gyud ang mayor sa siyudad.” Kun mao na, akong tambag ni Mike, mananom na lang siya’g kamote sa ilang tugkaran.