Hinigugma maghikog kun buwagan sa BF

Dear Atty. Divine,

Mangutana lang ko kun aduna ba ko’y tulubagon sa balaod. Adunay babaye nga nahilambigit nako sa una, gibuwagan ni nako siya kaniadto kay naay suicidal tendency. Unya wala siya mosugot, ug tungod kay nahadlok ko sa iyang bahad mao nga gisakyan na lang nako ang iyang trip kay ingon siya kun buwagan nako siya, maghikog siya ug nag-andam siya daan ug suicide note nga magtudlo kanako nga ako’y sad-an sa iyang pagahimoon.

Ang akong pangutana kun  may tulubagon ba ako sa balaod attorney kun maghikog siya? Hinaot nga matabangan ko nimo sa akong suliran. Daghang salamat. — Mr. Lonely

Dear Mr. Lonely,

Kun ang babaye nga imong gikarelasyon, single ug wa’y kabilinggan, ug ikaw sab single, then wa kini problema sa balaod. Apan kun imo siya nga buwagan unya maghikog siya, bisan pa kun iyang ibutang sa iyang suicide note nga ikaw ang hinungdan sa iyang paghikog kay imo siyang gibuwagan, wa kay tulubagon sa balaod kay dili man ikaw ang mihimo sa krimen.

Ang tawo mahimo lang liable o manubag sa usa ka krimen kun siya ang naghimo niini or aduna siya’y partisipasyon sa paghimo sa krimen. Apan kanang paghikog, siya man ang magkutlo sa iyang kinabuhi ug dili man ikaw, busa wa’y basehan ang pamilya sa pagpasaka unya og kaso batok kanimo.

Mas maayo nga kun gusto gyud ka nga mogawas sa inyong relasyon, imo lang siyang hinay-hinayon sa pagpasabot  hangtod nga siya makadawat sa kamatuoran. Thanks and God Bless! —Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Ceu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.