EDITORYAL – Adlaw sa Pamuo

Adlaw karon sa mga mamumuo, Mayo Uno. Gipaabot nga aduna’y daghang lihok protesta ug mga rally nga himoon ang mga kapunongan sa mga mamumuo sa kadalanan.

Balik-balik na pirme ang ilang mga ipadayag nga mga kasagmuyo sa gobiyerno ug sa mga panaad sa mga lider atol sa kampanya nga hangtod karon wala pa gihapon matagamtami sa maong sector. Ning bag-o, gisaway gani ang Association of Southeast Asian Nations kay matud pa wala’y silbe alang sa kaayohan sa mga mamumuo sa mga miyembro niini kay ang mga palisiya nga ilang mamugna pirme lang pabor ngadto sa mga negosyante.

May kamatuoran kining uban nilang reklamo, apan may uban nga wala kaayo makasabot kun unsa’y ilang gipangayo ngadto sa mga nagdumala sa gobiyerno kay basta lang magsaba-saba tungod ba kay nahaylo sa ubang mga kauban sa trabaho. Sa mga lehitimong reklamo, kinahanglang atimanon kini dayon sa gobiyerno tungod kay sa pagdagan sa panahon, wala mokunhod ang gastos sa tawo. Tinuod nga may mga expenses usab ang mga kompaniya sa ilang mga operasyon, apan makita baya ang kadako sa deperensya sa suweldo sa mga labaw, itandi sa kahimtang sa ilang mga mamumuo.

Bisan na lang gani ang batakan nilang katungod sama sa kontribusyon sa SSS, PhilHealth, pagbayad sa tukmang suweldo panahon sa holidays, katungod sa day-off, katungod nga bayran bisan dili makatrabaho kun masakit, katungod nga proteksyon sa kompaniya sa ilang trabahoan ug uban pa. Kini lang daan makapahupay na kini sa kabalaka ug kasingkasing sa mga mamumuo aron dili sila tantong mabug-atan. Apan sa paghimo niini, kinahanglang timbang-timbangon kay basin og mayabo na hinuon ang mga kompaniya nga gitrabahoan sa mga mamumuo nga makapasamot na hinoon sa problema sa unemployment.

Kun maayo ang modumala sa kompaniya, maayo usab ang iyang mga sakop ug makat-on usab ang mga bag-o nga nakasulod. Ang resulta niini, maayong produksyon nga makapalambo usab sa kompaniya.