Ang pusporo

Usa ka sunog ang miulbo sa Dakbayan sa Danao, Cebu ug ang gitumbok nga hinungdan mao ang pagduwa sa pusporo. Kining maong sunog nakaugdaw og 43 ka panimalay ug duna’y duha nga nakaangkon og second degree burns.

Apan base sa report, dili bata ang nagduwa og pusporo kay 17-anyos na man kini nga dunay problema sa pangisip. Sa makausa pa, giawhag namo ang publiko sa paghipos niining mga pusporo ug lighters nga dili daling makita ug makab-ot sa mga bata.

Mas labing maayo og ato kining ipasabot sa kabataan nga ang maong mga butang delikado ug dili kini duwaan. Alang sa mga ginikanan, inyong obligasyon ang paghipos niini aron dili kini maduwaan sa mga bata.

Batasan gyud na sa mga bata nga duwaan ang bisan unsang butang nga naa sa ilang atubangan ug labaw sa tanan malingaw kaayo sila niini kay makamugna man kini og kalayo, ug para kanila nindot kaayo ug makalingaw sa ilang panan-aw ug wala nila mahunahuna nga delikado diay kini.

Maayo na lang kay wala’y nakalas sa maong sunog ug dali kining nakontrolar sa mga sakop sa Danao City Fire Station nga pinangulohan sa bag-o niini nga City Fire Marshal nga si Senior Inspector Vilma Abarquez.

Ang maong sunog miabot sa 3rd alarm status. Hinaot nga dili na unta kita makadungog og balita nga ang hinungdan sa sunog mao ang napasagdan nga kabataan nga nagduwaduwa og pusporo sa umaabot. Ang inyong kabomberohan wala magkuwang sa paghatag ug pahimangno sa publiko.

Gumikan man gud sa ka simple sa maong fire safety tip, gibaliwala lang kini, apan kun atong subayon, ang maong hinungdan sa mga sunog nakaugdaw na og pipila ka milyon nga kabtangan ug gani may mga nakalas na nga kinabuhi.

Kinahanglan nga ato na kining hatagan og igong pagtagad aron makalikay kita sa sunog nga ang hinungdan gamay ra nga pusporo