Gipa-transfer ang kabahin sa yuta nga wa’y pinirmahan sa tag-iya

Dear  Atty. Divine,

Aduna ko’y lote nga akong nagarantiya ngadto sa pag-umangkon sa akong asawa tungod kay nakahulam kami og P100,000 ug ang among sabot nga kuhaan og 150 square meters ang among lote nga adunay kinatibuk-ang gidak-on nga 527 sq.mt. ug sila na ang magpa-subdivide sa lote.

Apan wala ko’y kalibutan kun pila ang ilang gikuha kay dugay nga ilang gitanggong ang akong titulo busa akong gipatawag sa barangay ug akong nahibaw-an nga 213 sq. mt. na lang ang nahibilin sa akong lote busa gikuhaan kini nila og labaw pa sa katunga. Wala mi gipirmahan nga Deed of Sale ug ang akong gipirmahan kadto ra gyud nga sa sketch plan ug verbal ra tanan namong sabot. Puwede ba kini nako nga ipakansel ug mapa-revoke? — Mr. C.

* * *

Dear Mr. C,

Kun wa kay gipirmahan nga Deed of Absolute Sale in favor sa pag-umangkon sa imong asawa sa portion sa property nga maoy magsilbing bayad sa imong giutang niya nga kuwarta, then unsa man diay ang ilang gibasihan sa pagpa-transfer sa subra sa katunga sa imong yuta? Mas maayo nga imo unang susihon sa Register of Deeds kun nganong nabalhin na sa ilang name ang portion sa imong property ug kun unsa’y ilang gibasehan sa pagpa-transfer kay wa man kaha ka mopirma og Deed of Absolute Sale.

Ang maayo nimong buhaton karon mao ang pagpangayo og Certified True Copy sa ilang nakuha nga titulo, certified True Copy sa imong titulo ug Certified True Copy sa tanang dokumento nga ilang gi-submit sa Register of Deeds nga maoy gibasehan sa pag-transfer sa portion sa imong yuta ngadto sa ilang pangalan. Kun imong makuha ang maong mga dokumento, mas maayo nga muadto ka sa imong abogado aron iyang matun-an ang imong kaso. Mahimo nimong ipa-Annul ang bisan unsa nga dokumento nga ilang gibasehan sa pag-transfer sa imong yuta ug imong ipa-cancel ang titulo nga gi-issue sa Register of Deeds ngadto kanila. Thanks and God Bless! – Atty Divine