Kun i-appoint na ang mga kapitan

Si Speaker Pantaleon Alvarez nga ania karon sa Sugbo alang sa usa ka dakong kalihukan labot sa ASEAN nagkanayon nga “priority bill” ang pagkanselar sa umaabot nga eleksiyon aron i-appoint na lang ang mga opisyal sa barangay, ilabi na ang mga kapitan.

Sumala pa ni Alvarez kagahapon nga hugot nga gisuportahan sa mga magbabalaod sa Ubos Balay Balaoranan ang balaodnon nga paghatag og gahum ni Duterte nga itudlo na lang ang kapitan ug mga konsehal kay sa ipaagi og piniliay.

Gisaysay ni Alvarez ang kahadlok nga gisulti ni Presidente Rodrigo Duterte nga kun idayon ang eleksiyon sa barangay, mahimo kining gamiton sa mga drug lord aron makabalik sila sa ilang dautang negosyo. Bitaw, mahimo man nga mogasto ang mga drug lord aron padag-on nila ang ilang mga kandidato sa barangay.

Balido kaayo nga rason ang pakiggubat ni Duterte batok drugas. Busa angayan kining suportahan sa mga mayor ug gobernador. Apan subo lang palandungon nga si Mayor Tomas Osmeña misupak sa pagbuot sa presidente nga i-appoint na lang ang mga kapitan, kay matud niya nga wala kini mahiuyon sa espiritu sa demokrasya.

Apan sa akong nahibaw-an, si Tomas pa lang ang mayor nga supak kaayo sa kabubut-on ni Duterte. Aw, hinuon dili man gyud ni siya supporter ni Duterte kay niadtong miaging eleksiyon sa 2016, hugot man gyud siyang nagsuporta kang Mar Roxas ug Leni Robredo.

Gani, adunay report nga mihungaw nga niadtong Lenten break, si Tomas ug si Leni, uban ni Senador Sonny Trillanes, nagkita didto sa South Korea. Adunay nagduda nga miapil si Tomas sa pagplano unsaon pagpalagpot si Presidente Duterte. (Tayming ra ba sa ASEAN meeting nga si Duterte gikasohan sa International Criminal Court.)

Ako na nga gisulti sa miaging mga lindog nga hadlok si Tomas nga ipaagi na lang og appointment ang mahimong OIC nga barangay captain kay naa may iyang Barangay Mayor’s Office kon BMO. Kining mga BMO nga mga pribadong indibidwal o mga konsehal nga lunod-patay sa Bando Osmeña Pundok Kauswagan nga nangampanya kang Tomas sa miaging eleksiyon, maoy mopirma kun adunay mga request sa City Hall. Kay kun ang kapitan nga dili BOPK ang mo-request, seguradong sa basurahan puniton ang request.

Pananglit idayon ang pag-appoint sa mga kapitan, mawani ang BMO ni Tomas. Usik ang pangandam. Maminaw lang unta si Tomas sa kabalido sa rason nganong dili na lang mag-eleksiyon sa barangay tungod sa kampanya ni Duterte batok gidiling drugas, iyang ipadaplin ang politika ug kahadlok nga mawad-an siya og kapitan nga igo lang moluhod ug mohalok sa iyang sampot.

Kun iagi og appointment, kinsa kaha’y mo-endorso sa mga ngalan sa mga kapitan nga ipang-appoint?