Overloading

Karon nga nagsunodsunod na ang mga panghitabo ug aksidente sa kadalanan, nakahunahuna na usab kita pag-revisit sa giingon nga outdated na nga balaod, ang Republic Act No. 4136, o ang Land Transportation & Traffic Code of 1964. Daan na g’yud kaayo, irrelevant na, dili na makatubag sa mga panginahanglan karong panahona.

Matud ni Senador JV Ejercito, vice chairman sa Senate Committee on Public Services, ang maong balaod nagpahamtang og gamay nga silot sa mohimo’g overloading, gikan sa P2,000 ngadto sa P3,000 lang, ug pagsuspenso sa Certificate of Public Convenience.

Ang maong balaod wala’y lagda nga magpahamtang og silot base sa kadaot nga nahimo ngadto sa mga pasahero gumikan sa aksidente.

“What we need are stiffer penalties for overloading,” nagkanayon si Ejercito. Kining maong mga laraw ug lakang ni Ejercito namugna gumikan sa aksidente sa Nueva Ecija, nga mikalas og daghang kinabuhi.

Hinaot nga dili kini mahilom, sama sa unang mga aksidente sa kadalanan, diin ang atong gobiyerno, moaksiyon pinaagi sa mga press releases tapus sa hitabo, unya, mahilom, ug maghuwat og laing hitabo. 

Pastilan!

* * *

Facebook. Kamong nagduwaduwa sa Facebook, enjoy kaayo, kinahanglan magbantay, ilabi na ang mga batan-on. Imagine, usa ka taga-Manila, 12 ang edad, seventh grader (ato lang nganlan og Ana), moanhi na unta sa Cebu kay makigkita sa iyang “uyab” nga iyang ka-Facebook, 35 ang edad.

Maayo man gani kay nahibaw-an sa amahan, ug wala mahinayon sa pag-anhi sa Cebu, kay na-intercepted sa mga port authorities, ug wala tugoti nga makasakay sa barko kay siya ra usa ug wala’y pagtugot gikan sa DSWD.

Ang plite? Gipadad-an siya og P1,300 sa iyang “uyab.” Excited kaayo siya. Apan, kay wa mahinayon, ang lalake maoy miadto sa Manila aron pagkuha ni Ana, kay anhi na sila mamuyo sa Cebu. Ang amahan mikontak sa kapolisan, ug didto sulod sa usa ka kan-anan sa pier, gidakop ang Facebook boy.

Miundang na pag-eskwela si Ana, ug ang tuition inay ibayad sa tunghaan, iyang gipadala nganhi sa iyang uyab nga ka-Facebook. Grabe nga “gugma” sa usa ka bata, ug grabe nga pangilad sa usa ka 35 anyos nga lalaki.

Mikompisal si Ana nga sa una, wala sila motug-an sa tinuod nilang mga edad – 17 siya ug ang lalake 25. Apan, sa ngadto-ngadto nagtug-anay na sila sa tinuod nilang mga edad, apan tungod kay nidulot na’g maayo ang ilang paghigugmaay, wala nila igsapayan ang gap sa ilang mga edad.

Kamong mahiligon sa Facebook, ingat!