Kinsa ang masunod?

Sigun sa balita ning maong pamantalaan, naghatag karon og kalibog sa Bureau of Customs ang managlahi nga memorandum order nga giluwatan sa duha ka dagkong opisyal sa maong ahensiya kabahin sa deadline sa Minimum Access Volume sa rice importation.

Ang maong kalibog gumikan sa nagpadayong kontrobersiya sa National Food Authority kabahin sa maong programa sa rice importation. Si BOC deputy Commissioner Natalio Ecarma niluwat og memorandum niadtong Marso 17 ngadto sa tanang district collectors ug sub-port collectors sa tibuok nasud.

Nagpahibalo kini nga ang extension sa rice shipment nga apil sa MAV, mahuman kini niadtong Marso 31, bisan asa nga nasud gikan. Apan ang memorandum ni Ecarma nisupak sa giluwatan nga memoradum order ni Customs Commissioner Nicanor Faeldon niadtong Marso 7 nga nagkanayon nga ang MAV sa tuig 2016 mahuman na sa Pebrero 28, 2017, gawas sa rice shipment nga gikan sa India ug Pakistan nga mahuman sa March 31, 2017.

Si Commissioner Faeldon nagkanayon nga ang pagpalit og bugas gikan sa nasud sa Pakistan ug India kinahanglan nga imbargohon ug konpiskahon. Si Verne Enciso, ang officer-in-charge sa Customs Intelligence and Investigation Service-Cebu, kinsa maoy nirekomendar sa pagsakmit sa P289 milyones nga smuggled rice nga gikan sa Vietnam kay wala kini importation permit gikan sa NFA, nagkanayon nga iyang gituman ang mando ni Faeldon isip maoy labing dakung opisyal sa BOC.

Apan naobserbahan ni Enciso nga ang Customs Port of Cebu lang ang nagtuman sa kamandoan ni Commissioner Faeldon tungod kay ang uban nga Port sa nasud wala moimbargo o mikonpiskar sa mga rice shipment nga walay gipagawas nga NFA import permit.

Mas maayong klarohon sa mga opisyal sa Customs ang mga patakaran nga gusto nilang ipatuman kay makadaot kini sa gobiyerno ni Presidente Rodrigo Duterte. Dili maayong tan-awon ug paminawon sa katawhan nga ang mga opisyal sa gobiyerno ni Presidente Duterte wala magkahiusa sa ilang kampanya kontra-kurapsyon.