Balaan nga adlaw

Excited na ang tanan sa pag-uli sa ilang tagsa-tagsa ka mga probinsiya aron adto mamalandong sa mahal nga adlaw.

Maayo kun ingon niini ang tumong sa mga tawo nga mao ang paghandom sa mga sakripisyo ni Hesukristo pinaagi sa pagpalansang sa krus aron matubos ang Iyang mga nilalang gikan sa sala.

Apan may mga tawo usab nga excited lang sa ilang bakasyon, ilabi na sa beach, o bisan asa nga dapit diin sila makalingaw-lingaw.

Hinoon, mahimo ra man kini sanglit kahigayonan na man usab nga makaginhawa sila gikan sa stress o grabeng kakapoy tungod sa trabaho.

Apan pahinumdom lang, nga unahon gyud ang espirituhanon nga obligasyon, alang sa pagpalandong sa Semana Santa.

Ang lipay-lipay mahimo man nga buhaton matag adlaw, apan ang paggahin og oras alang sa paghinulsol sa mga kasaypanan sa adlaw nga balaan, kausa ra mahitabo sa usa ka tuig.

Samtang alang sa mga mobiyahe, kinahanglan nga mag-amping gyud sa kanunay, ilabi na kadtong long distance trip.

Seguraduhon nga na-check up ang mga ligid, makina ug tanan nga component sa sakyanan aron makalikay sa disgrasya.

Alang sa mga mahilig mag-selfie, dayon upload sa social media, ayaw gyud intawon palab-ani, ilabi na og wala’y bantay sa gibiyaan nga pinuy-anan kay nakatutok usab sa Facebook ang mga kawatan ug maoy mopuli sa pagsaka sa balay ug kuhaon ang tanan nimong mga butang.

Amping lang gyud kanunay mga bai!