Magtiayong magseks ngano kanunayon (2)

Ang wala’y igong kahibalo sa pagseks, nga sagad atong maobserbahan nga magpaturagas lang, wala’y preno nga bisa’g mangabunggo hala bira gyud. Ang uban sab, maayo la’g ganahan kun wala ok ra, mao’ng kulang sa kadasig. Busa, ania ang duga’ng katarungan, ngano kanunayon sa magtiayon ang pagseks.

* Makalipay – bisa’g panagsa lang makalipay na kini, ngano dili man kanunayon nga maglipay kita sa pagseks. Pahimudsan samtang may kusog ilahutay sa seks. Epektibo lang ni sa kwalipikadong pares. Dili kay modalikyat pa’g lain, imbes malipay, mapun-an hinuon og problema nga makaguol.

* Makapalambo sa panag-uban – nakabakos nga molig-on ang relasyon sa managtiayon, kun magsige og seks. Maunongon sa panagsuod nga kanunay mohawid sa pagsinabtanay nga paraygon.

* Makapaundanon sa lawas – kay ang pirme magseks ehersisyo sad ni, makapahilis sa tambok o bilbil, nga ubanan la’g diyeta o kontrol sa pagkaon.

* Himsog nga mental – makapahimsog sa abilidad ug kapasidad sa utok. Dili basta-basta matandog ang iyang kalig-on (stability), nga makabaton sab og tukma o husto’ng pagdisisyon. Makapahapsay kini’s trabaho sa mental.

* Pampatulog – kun dili dayon makatulog, ang sulbad? Mag-seks kanunay, kay human sa kombate, moharuhay ang panghunahuna, kay igtangkod sa gana o ‘orgasm’ mosugwak na’ng mga ‘endorphin’ ug ‘ocytocin’ hormones nga makapatulog. Human sa seks, tungod sa kakutas, di magdugay nahinanok na.

* Momenus ang risgo sa kanser – sa lalakeng kanunay magseks, layo ang risgo nga magkasakit og ‘prostate cancer’. Sa babaye mao sab momenus ang risgo sa ‘breast cancer’. Ang pagmabdos ug pagkontak sa mga ‘sperm cells’, mao’y may kalabtanan nga ang babaye layo ang purohan magka-‘breast cancer’.