Alas sa laag
Para sa mga laagan, duna ko’y nakit-an nga bag-ong app nga makatabang sa inyong pakigsulti sa mga molupyo sa mga nasud nga inyong duawon sa ilang kaugalingong pinulongan: Ang Microsoft Translator nga mahimong ma-download sa Play Store sa Android ug sa App Store sa iPhone.
Nalingaw ko nga nisuway sa app ug naghunahuna nga mahimong naapsan na sa Microsoft ang nag-una nga Google Translate, nga gipakaingon nako nga kutob ra sa letra, kay mao ra man ang akong nasuwayan, samtang ang Translator maminaw lang ug mosulti gyud sa langyaw nga hubad.
* * *
Sa dili pa nato itandi ang duha, tuguti nga isumbong nako ninyo nga ang una gyud nako nga nahuna-hunaan samtang nisuway sa apps sa duha ka higanteng kompaniya mao ang akong mga kaila nga adik sa biyahe. Sama ka kanila kun gihimo nimo ang mosunod:
Gibutangan nimo og lanog nga notification ang imong telepono sa mga promo sa mga kompaniya sa ayroplano;
Momata ka og tungang gabii aron maka-una pag-book sa labing barato nga flights sa unang mga gutlo sa pagtanyag; ug
Giapil og book ang imong mga higala sa wa’y pananghid nila.
* * *
Mangahas ko pagtambag nimo sa pagsuway sa duha ka apps, nga pulos libre, aron makapili unsay mas mapuslanon para nimo. Ang bugtong bentaha sa Translator para nako mao ang mas nindot niyang porma.
Ang Google Translate, kay mas taas na man og agi, makahubad na og 90 ka pinulongan samtang ang Microsoft Translator may 50 pa lang ka pinulongan. Ang Microsoft Translator magamit lang kun duna kay internet access samtang ang Google Translate magamit offline.
* * *
Labing dakong bentaha sa Google Translate sa akong kasingkasing: Makahubad sa langyaw nga mga pinulongan ngadto sa Cebuano ug sa Cebuano ngadto sa ubang mga pinulongan. Filipino pa ang nahibaw-an sa Microsoft Translate.
Managsama hinuon ang Translate ug Translator nga takus nga maminaw sab sa imong ikasulti nga langyaw ug dihadiha mohubad sa iyang pinulongan ngadto sa Iningles o, sa kaso sa Google, Cebuano.
Hinaot nga inihap na lang ang mga adlaw nga ang managlahi nga pinulongan magsilbe nga babag sa panagsulti, panaghigalaay ug panaghiusa sa katawhan sa bisan asa nga suok sa kalibutan.
- Latest
