EDITORYAL - Panaugdaog sa mga kabus

Aron pagdasig sa katawhan nga maghugpong sila ug maningkamot aron madugangan ang ilang kinitaan, gimugna ang balaod nga nagmando nga dili pahamtangan og buhis ang mga kooperatiba.

Tuod, human mamugna ang maong balaod, midagsang ang mga kooperatiba dinhi sa nasud nga gisalmotan sa mga yano nga katawhan nga mitampo sa ilang ginagmay’ng tinigum aron magamit isip puhonan sa negosyo. Diha sa kooperatiba, ang mga miyembro makahuwam og kuwarta nga gamay ra kaayo ang tubo, aron magamit isip puhonan sa lainlaing mga negosyo, ug sa ingon dili sila maglisud sa pagbayad sa ilang utang.

Apan may lakang karon ang pipila ka magbabalaod nga tangtangon ang prebilihiyo nga gihatag ngadto sa mga kooperatiba. Mikisikisi ang mga miyembro sa kooperatiba sa nasud, ug gani dunay kalihukan nga pasiugdahan sa hinapos ning bulana aron sawayon ang maong balaudnon.

Dinhi sa Sugbo, nangalipay ang mga miyembro sa lainlaing kooperatiba tungod kay gipasaligan sila ni Presidential Assistant Michael Lloyd Dino nga dad-on ang ilang sentimento atol sa tigum sa mga sakop sa gabinete.

Bisan si Dino nakasabot nga kun pahamtangan na og buhis ang mga kooperatiba mahimong mosaka na ang ipahamtang nga interest sa mga miyembro nga manghuwam og salapi nga gamiton sa puhonan sa ilang negosyo.

Kining gihimo sa pipila ka magbabalaod tataw kaayo nga gihimo nila agi og sipsip ngadto kang Presidente Duterte aron nga madugangan ang koleksyon sa kagamhanan sa wala’y paghunahuna nga daghang mga kabus ang masakripisyo.

Dili sab gyud hinoon ikalimod nga adunay pipila ka tawo nga miabuso sa balaod nga naghatag og exemption sa pagbayad og buhis sa mga kooperatiba pinaagi sa pagbutang sa dako nilang pundo diha sa lainlaing kooperatiba aron dili sila makabayad og buhis.