Unsay inyong baruganan niini?

Daghan ang nagkasumpaki sa ilang baruganan kun angay ba nga ang Music Festival ipahigayon sa lungsod sa Santa Fe karong Miyerkules Santo, Abril 12.

Ang uban miingon nga dili kuno angay’ng manghilabot ang kadagkoan sa simbahan sa kalihukan sa mga opisyal sa lungsod kay klaro ang balaod nga nag-separate sa Church and State.

Dunay miingon nga angay’ng irespeto ang pagbalaan sa Holy Week. Buyno, para kanako, iya-iya og baruganan ang katawhan ug angay kini nga respetohan.

Apan kun ako ang opisyal sa Santa Fe, dili nako ipahigayon ang Music Festival sa maong adlaw. Mas labing haum nga adlaw sa pagpahigayon sa maong kalihukan ang adlaw’ng Domingo, kay Easter Sunday na.

Naandan na man gud kanato nga mga Kristiyanos nga mobalaan gayud sa gitawag nato og “Mahal nga Adlaw.” Kaniadto gani, ang atong mga ginikanan motudlo na sa ilang mga anak nga dili na magkiat kun mosugod na ang Holy Week.

Kun imong sabton pag-ayo, igo na lang kita nga naghandom sa adlaw nga nagsakripisyo si Ginoong Jesus para kanatong katawhan, base sa mabasa nato sa Bibliya ug sa kanunay’ng ibatbat sa kaparian.

Bisan si Gobernador Hilario Davide III supak nga ang Music Festival ipahigayon sa Miyerkules Santo. Base sa kasaysayan, sa maong adlaw gidakop si Jesus ug gipasakripisyo.

Wala gyud kita’y mahimo kun ang mga opisyal sa lungsod sa Santa Fe mopadayon sa ilang kalihukan atol sa Miyerkules Santo. Buyno, anaa na sa katawhan ang paghukom.

Kun sa inyong pagtimbang-timbang, dili gyud tukma ang maong kalihukan atol sa maong adlaw, ayaw pagtambong. Ingna ang inyong mga anak, mga paryente nga likayan ang maong kalihukan.

Apan kun sa tan-aw ninyo sayop ang kaparian sa ilang pagbabag nga mahinayon ang Music Festival atol sa maong adlaw, hala, tambongi kini ninyo ug hikalimti ang pagtulon-an nga gitudlo kaninyo sa inyong mga ginikanan.

* * *

Nindot kaayo kun mapalihok dayon ni Presidential Assistant for Visayas Michael Lloyd Dino ang paghimo’g dugang mga karsada dinhi sa Dakbayan sa Sugbo.

Usa sa mga karsada mao ang gikan sa V. Rama Avenue ug molapos kini sa Gorordo Avenue. Paminaw nako gikan sa Guadalupe ni nga karsada paingon sa Lahug.

Pagkanindot. Anaa na man ang maong karsada, apan nagkinahanglan pa nga palapdan. Si Dino makatabang kaayo aron mopaspas ang maong proyekto pinaagi sa pag-follow up kanunay sa DPWH.

Kay may lima pa man ka tuig si Dino sa katungdanan, daghan pa siya og mabuhat nga proyekto pagpalambo sa dakbayan.