Dugang 1 million unemployed Pinoys

Good news, bad news. Gibanabana nga kapin sa usa ka milyon ka estudyante sa kolehiyo ug sa mga vocational schools sa tibuok nasud ang mo-graduate karong panahona. Nagpasabot nga mapun-an ang populasyon sa atong mga professional. Nindot paminawon. Good news.

The bad news. Ang mga lider sa pamuo nabalaka nga lagmit ang maong mga fresh graduates, mo-end up unemployed, kun makatrabaho man, ma-‘endo’ o below minimum ang mga sweldo.

Matud ni Alan Tanjusay sa Associated Labor Union, “prospects are not bright for the estimated one million graduates. The job-skills mismatch, short term contractual work, low wage and unsafe workplaces are awaiting these graduates.”

So, ang pagka-walay trabaho o ang pagkagamay sa sweldo maoy naghuwat ning maong mga graduates. Ang dakong hinungdan niini, mao ang iyang giingon nga job-skills mismatch, kun dili pagkatakdo sa kahibawo o katakus ug sa gikinahanglan nga trabaho.

Atong hinumduman nga tapus molingkod ang mga bag-ong presidente sa nasud, silang tanan mosaad pagsulbad sa unemployment problem. Pananglitan, sila si kanhi Presidente Gloria Arroyo ug Noynoy Aquino misaad og one million new jobs a year.

Karon, pito sa matag napulo ka empleyado sa 41 milyones ka trabahante tibuok nasud ang contractual. Sa ato pa, dili regular nga employment, tagpila lang ka buwan, ma-jobless na usab sila.

Hinoon, si Labor Undersecretary Joel Maglunsod, mipasalig nga liboan ka trabaho ang naghuwat sa mga fresh graduates. Matud pa, 10,756 job vacancies ang bukas alang sa mga graduates. Nganong wa man ni ma-fill up sa daan nga mga graduates nga hangtod karon unemployed pa?

Anyway, manghinaot lang ta nga tinuod kining giingon ni Maglunsod, nga daghan ang mga bakante nga trabaho ang naghuwat sa mga bag-ong graduates. Perennial kini nga problema, dako ang akong paglaum nga masulbad kini sa Duterte administration

* * *

Sa Northern Samar, usa ka kanhi OIC-Governor ang gisentensiyahan og 14 ka tuig nga bilanggo gumikan sa kapakyas pag-uli sa duha ka revolver ug usa ka motorsiklo bisan kun sa kaulahian iya ra nga nauli ang maong mga government properties.

Matud sa anti-graft court, “the liability for malversation went into effect from the time a demand or accounting has been made.”  Sa ato pa, pagdemanda pag-uli sa nahisgutang public property, wala dayon mosanong ang OIC, busa nakasohan gyud siya. Mi-file ang OIC og Motion for Reconsideration.

Wa kaayo ko masinati niini, apan, mao ra og may susama nga kaso niini dinhi sa atong siyudad. Huwat lang ta.