Demokrasya sa narcopoliticians

Daghang mga international agreements nga giintrahan ang Pilipinas. Sa atong Konstitusyon, ang mga international agreements magsilbe na usab nga balaod nga pagasundon dinhi sa atong nasud. Ubos sa doktrina nga “pacta sund servanda” ang Pilipinas adunay responsibilidad pagsunod sa mga kalibutanong lagda.

Apan nagpasabot ba kini nga kinahanglan na lang kitang moyukbo ug moluhod sa ubang mga dagkong nasud kay lagi nahikot ang liog sa Pilipinas sa gipangsudlan nga mga international agreements?

Gipangutana ko kini taliwala sa pagsaway sa European Union sa kampanya batok drugas ni Presidente Rodrigo Duterte. Kining pagsaway sa EU migawas human nasupalpal ang pagpadala og video ni Bise Presidente Leni Robredo ngadto sa United Nations nga nagsaway sa administrasyon sa pakiggubat batok drugas, ug gi-mislead ang UN nga 7,000 na ang nangamatay sa kampanya.

Human niini, gipakadako sa mga kritiko ni Duterte ang pagsaway sa EU. Misunod dayon ang opisyal sa Human Rights Watch sa pag-post sa social media sa iyang pagsaway sa ‘war on drugs’ ni Digong. Matud niya ang mga pobre lang ang nangamatay sa kampanya batok drugas.

Unsa diay gusto niining opisyal sa HRW, pamatyon na ang mga adunahan nga adik? Kun pamatyon na ang mga adunahang adik, moreklamo na usab sila kay bayolente ra. Wala girombo sa kampanya ang mga pobre lang. Natural nga sila ang unang mangatumba kay kasagaran sa misulod niining ilegal nga negosyo mao ang mga pobre nga kun gukdon na sa balaod, makigpatay kay makulban man sa kaldero.

Si Presidential Assistant for the Visayas Mike Dino, sa iyang pamulong atol sa pagbendisyon sa multipurpose building sa PDEA-7 kagahapon, nagkanayon nga unang mabulahan sa kampanya sa drugas ang mga pobre.

Sumala pa niya nga ang mga pobre ang unang giigo niining sindikato sa ilegal nga drugas ug ang utok sa mga pobreng adik ang unang gidaot sa shabu.

Gihagit niya ang mga kritiko sa pagpiyong sa mata ug paghunahuna sa usa ka eksena sa usa ka pamilya nga adunay anak nga adik nga kanunay lang magpabadlong pinaagi sa pagpangawat og kaldero ug kaha aron ipalit og drugas. Kun wala nay kawatonon sa ilaha, mangawat og hinayhay ug manglungkab na sa mga silingan ug ngadto sa laing lugar.

Busa kun ipaundang sa EU, UN, ug sa HRW ang kampanya batok drugas, tabla ra nga nagsulti sila nga ang mga pobreng nahimong kawatan tungod sa drugas, gusto nilang pabalikon sa pagpangawat, panglabni, ug pagpanglungkab.

Mao ra usab kini sa mga supakero sa gusto ni Duterte nga dili ihinayon ang barangay election. Kang Mayor Tomas Osmeña pa, ang demokrasya sa pagpili og opisyal sa barangay ang gisakripisyo kun walay barangay election. Ingna hinuon, demokrasya sa mga narcopoliticians, motuo pa ko.