Makadawat ba’g separation pay ang contractual employee?

Dear Atty. Divine,

Contractual employee ko sa usa ka kompaniya. Karong bag-o, nakadawat ko og notisya gikan sa akong company nga dili na nila i-renew ang akong kontrata busa kutob na lang ko this month. Ang akong pangutana, makapangayo ba ako og separation pay gikan sa akong company tungod sa wa na nila pag-renew sa akong kontrata? Daghang salamat. — Lito

Dear Lito,

Ang contractual employee, usa ka empleyado nga fixed ang iyang term sa pagtrabaho. Sa ato pa, kun dili i-renew sa kompaniya ang iyang kontrata then automatic siya nga terminated na sa iyang trabaho. As a general rule, ang contractual employee dili entitled og separation pay kun kini napahawa sa trabaho kay mi-end na ang iyang kontrata.

Ang separation pay madawat lang kini sa mga empleyado nga nataktak sa trabaho for authorized causes base sa nalatid sa Article 283 ug 284 sa atong Labor Code. Sa imo nga kaso, wa ka gitaktak sa kompaniya, kun dili, mi-expire na ang imong kontrata ug wa na kini i-renew sa company busa wa kay madawat nga separation pay.

Hinuon aduna sab kini exception, kun pananglit ang contractual employee gitaktak sa wala pa matapos ang iyang kontrata, then that’s the time nga makabayad og separation pay ang company kay ang usa ka contractual nga empleyado adunay security of tenure for a limited period nga nalatid sa iyang kontrata.

Sa ato pa, kun usa ka tuig ang contract unya gitaktak siya after seven months, then mahimo siyang makapangayo og separation pay kay gitaktak man siya sa wa pa mo-end ang iyang kontrata. Apan ang exception sab niini, kun gitaktak ang empleyado for just causes o base sa Article 282 sa Labor Code gumikan sa pagpabadlong o kalapasan sa balaod nga iyang nahimo, then wa sab siya’y makuha nga separation pay. Sa ato pa, kining tanan magdepende kun unsay mga sirkumstansya sa iyang pagkataktak. — Atty. Divine