Benham Rise na pud!

Angay tutokan karon sa gobiyerno ang Benham Rise nga mao na pud kini ang gibirigbirigan sa China. Kagahapon, ang Foreign Ministry sa China miluwat og pamahayag nga bisan nasulod sa 200-nautical mile exclusive economic zone ang Benham Rise, ang Pilipinas dili mahimong makapangangkon niini.

Niadtong 2012, ang United Nations Commission on the Limits of the Continental Shelf miaprobar sa gisumiter sa Pilipinas niadtong 2009 nga limit sa continental shelf sa Benham Rise region. Kini maoy hinungdan nga ang Pilipinas nakahimo og exploration ug development sa mga rekursos naturales sa Benham Rise.

Igo lang mi-react ang China sa pagka-alarma sa Pilipinas, pinaagi sa Department of National Defense, sa dihang nabantayan nga adunay Chinese survey ships nga naghimo og oceanographic research sa rehiyon. Gani, ang DND mipadala na og sulat sa Chinese Embassy aron pangayoan og klaripikasyon sa nabalita nga pagsulod sa barko sa China sa Benham Rise.

Ang Foreign Ministry sa China mitubag sa pagkaalarma sa Pilipinas pinaagi sa pagbatbat sa UN Convention on the Law of the Sea (UNCLOS) nga nagkanayon “a coastal state’s rights of the superjacent waters or of the air space above those waters, nor do they affect foreign ships’ navigation freedom in the coastal state’s EEZ and on the high seas, or their innocent passage through the coastal state’s territorial sea as supported by international law.”

Apan klaro nga pagbutang lang og kalibog sa international community kining sa China kay samtang giaprobahan na sa UN Commisson on the Limits of the Continental Shelf ang pagsumiter sa Pilipinas sa pag-angkon sa Benham Rise, ang China mibatbat sa UNCLOS. Klaro man unta sa UNCLOS nga ang kaugalingnang katungod sa usa ka nasud, sa continental shelf exclusive kini.

Apan kun ang Coastal State dili mo-explore sa contintental shelf o mohilabot sa mga rekursos naturales, walay makahimo niining maong mga kalihukan kun walay dayag nga pagtugot sa Coastal State. Laing girason sa China mao nga mi-exercise lang ang survey ship niini sa “freedom of navigation” ug “right of innocent passage” kay nag-oceanographic survey man kini. Ang balaod sa kadagatan nagkanayon nga kining duha ka katungod sa barko sa laing nasud sa pag-agi sa teritoryo sa laing lugar mahimo lang kun wala kay laing buhaton.

Usa pa, kun mao kini ang argumento sa China, aw, dako diay na nga kalapasan ang ilang gibuhat sa South China Sea sa paghimo artificial reef pinaagi sa pag-reclaim ug pagbutang og mga missile system sa maong mga artipisyal nga mga isla nga hilabihan na nga duola sa Palawan.

Nagduda ko nga gipalibog lang sa China ang kalibutang komunidad.

Aduna usab hinuoy nagtuo nga buringog ang China sa pagsabot sa mga balaod sa kadagatan. Hahay!