Simbahan saksi sa tukhang sa kapolisan

Gidapit sa kapolisan dili lang ang Simbahang Katoliko, kun dili, ang tanan nga relihiyoso nga kahugpongan sa pag-uban sa kampanya batok sa ilegal nga drugas.

Gawas sa pagtinabangay, mapatuman gyud ang transparency, ilabi na sa ilusad nga mga operasyon sa mga otoridad.

Kini gumikan usab sa mga katahap ug pasangil nga giabusohan sa kapolisan ang tawhanong katungod sa mga suspetsadong durugista, ilabi na kun adunay mamatay sa operasyon.

Hinuon, katungod man usab sa simbahan o ni bisan kinsa nga mosaway sa mga panghitabo nga dili nila mauyonan. Gani ipaagi pa man sa pastoral letter sa simbahan ug basahon atol sa wali sa Misa.

Oki ra man ni, apan mas maayo pa gyud kun mahimong eye-witness ang mga pari ug pastor sa pagahimoon sa mga polis. Lahi ra man gyud kun gikan lang sa mga balita ang ilang madunggan kay sa sila gyud ang makasaksi.

Kun makita nila nga niabusar ang mga pulis, diha-diha dayon ilang sitahon. Gawas pa, magkinto ang mga otoridad sa pagpabadlong kun adunay presensya sa pari.

Sa samang higayon masabtan sa mga pari ang trabaho sa atong kapolisan ug dili dayon hukman nga kumo adunay napatay nga suspek sa operasyon, isipon na dayon kining gituyo.

Dinhi posibleng  masuta nga tinood gyud diay nga misukol ang mga dinakpan hinungdan nga napusilan. Imbes nagbaslanay ug pagpanaway, magtinabangay na lang aron ang problema mahatagan og kasulbaran.