Salamat Senyor Sto. Niño!

Nagmalampuson ang pagsaulog sa Sinulog 2017 pinaagi sa hugot nga panagtambayayong sa tanan nga mga stakeholders, gikan sa mga otoridad ug syempre sa tanan nga katawhan nga nagpakabana aron hapsay ug han-ay ang tanan.

Sa pagbukas sa kalihokan sa Sinulog 2017 gipaningkamotan nang daan sa mga otoridad nga mapatuman ang paghatag og kaluwasan sa mga tawo sa Walk with Jesus nga gatosan ka mga debotos ang mitambong hangtod na sa Walk with Mary.

Taliwala sa posibleng mga hulga sa terorismo, gipatuman sa kapolisan ang zero signal pinaagi sa pagpalong sa mga cellsites diin gitumong aron dili mahimong triggering devise ang mga gadgets sa bomba. Gitugotan kini sa National Telecommunication Commission (NTC).

Balik sa naandan ang mga tawo, nalutas sa selfie ug sa groupie ang mga tawo sukad sa fluvial procession, solemn foot  procession ug mismo sa Sinulog grand parade.

Nakahasol man ang gipatuman nga security protocol apan dako kaayo kini og natampo sa paghatag og kasegurohan ug kaluwasan sa kinabuhi sa katawhan. Apan alang nako mas maayo ang naasoy nga sistema sanglit nakatutok ang tanan nga mga debotos sa tim-os nga pangaliya sa Balaang Bata.

Ang teknolohiya man gud ilabi na ang social media ang makakha sa atensiyon tungod kay imbes mag-ampo ang mga tawo magsige na lang og selfie dayon upload sa social media.

Nindot paminawon nga mora’g nag throwback o nibalik kita sa kanhiay nga panahon dihang wala  nauso ang teknolohiya diin yano apan bongga gihapon ang Sinulog.

Labaw sa tanan, nagmalampuson ang Sinulog 2017 gumikan sa hugot nga pag-ampo kang Senyor Sto. Niño nga kanunay mipatalinghug ug nihatag kanato og proteksyon. Salamat Senyor Sto. Niño.

Pit Senyor!