EDITORYAL - Kahugaw sa sapa

Makapabalaka kaayo ang nabutyag nga kasayuran nga hugaw ang ilado kaayong Kanlaob River nga nagsubay sa mga lungsod sa Alegria ug Badian kay posible man nga daghang turista nga gusto unta nga mosuroy ug maligo sa maong sapa ang dili na modayon sa ilang tinguha.

Dili mabasol sa kadagkoan sa kagamhanan kun ang maong mga tawo mahadlok na nga maligo sa maong sapa tungod kay gipahibalo na sa Cebu Provincial Health Office nga adunay kagaw kon bacteria ang tubig sa maong sapa.

Ang tinuod, dili lang kay ang Kanlaob River ra maoy posible nga adunay kagaw, kun dili, hayan apil usab ang uban pa nga mga sapa ug busay, kon mga waterfalls nga sagad bisitahan sa mga turistang lokal ug mga langyaw.

Sagad sa mga waterfalls nga bisitahan sa mga turista, apil na kadtong tua sa ubang dapit sa nasud, ang tubig dili gikan sa mga tubod. Ang tubig gikan kini sa sapa nga gipasagdan ra sa mga opisyal ug wala siguroa ang iyang kalimpyo.

Gibutyag nga ang hugaw sa tawo ug mananap nakatampo sa pagkuyanap sa kagaw nga makahatag og peligro sa panglawas sa mangaligo. Aron unta nga malimpyo-limpyo og gamay ang mga sapa ug waterfalls, angay’ng idili ang pagpuyo daplin sa sapa.

Dili ikalimod nga sagad sa mga nagpuyo daplin sa sapa didto sa probinsya wala’y mga pansayan, ug kun aduna man, wala sila’y mga pundohanan sa hugaw ug direkta ra kini nga ipaagos ngadto sa sapa.

May nagbuhi pa og mga baboy nga ang hugaw gikan sa piggery direkta ra nga ipaagos ngadto sa sapa. Kay ang mga hingtungdang lungsod sa Badian, Alegria, Barili ug uban pa, nakakuwarta man sa mga sapa ug waterfalls nga anaa sa ilang dapit, angay na sila nga mohimo og estrikto nga lakang paglimpyo sa ilang mga tourist destination.