Direktor Burdeus na-"misinformed"

Ang Barangay Mayor's Office kon BMO gikagubtan sukad milingkod og balik si Mayor Tomas Osmeña sa Cebu City Hall. Apan karong bag-o, ang Department of Interior and Local Government sa rehiyon mismo ang miingon nga ang BMO wala maka-duplicate sa function sa barangay tungod kay wala gani kini mag-exist.

Sumala pa ni DILG-7 Director Rene Burdeus nga ang nag-exist mao ang mga Barangay Disaster Control Centers kon BDCC.

Nagtuo ko nga "misinform" si Burdeus kabahin niining isyuha. Busa, akong girekomendar ngadtong direktor Burdeus sa pagsuroy sa mga barangay aron iyang makit-an ang kamatuoran kalabot sa BMO.

Sa mga barangay, wala magtagotago ang operasyon niining BMO. Ang mga tawo nga sinaligan ni Tomas sa nagkalainlaing barangay sa siyudad sa Sugbo anaa mag-opisina sa laing dapit nga gawas sa barangay hall, kasagaran anaa sa balay sa iyang sinaligan, nga mao usab ang "presumptive candidate" pagka-kapitan sa BOPK kun mahinayon ang eleksiyon sa barangay.

Makahingalan ko og mga "BMO officer" nga nag-operate, apan dili lang nato hinganlan kay ang uban niini akong mga higala.

Apan mismo si Tomas adunay mga pamahayag sa media nga angayang basahon ni Burdeus. Sa maong mga pamahayag iyang gikonpirmar ang existence sa BMO. Si Tomas mismo ang miingon sa media nga dili niya tagdon ang mga dokumento nga pirmado sa mga kapitan nga dili iya sa BOPK kay lagi "weder weder lang."

Maayong mahibalo si Burdeus nga kanang BDCC gihimo lamang kanang takuban aron mahimong lehitimo ang BMO sa mga barangay. Apan sa pagkatinuod, kun ugkaton lang ni Burdeus, naka-duplicate kini sa "powers, duties, responsibilities, and functions" sa mga kapitan sa barangay, kay sumala pa ni Tomas mismo nga dili niya i-honor ang pirma sa mga kapitan nga dili iya sa BOPK, apan aksyonan kun pirmado sa iyang tawo sa BMO.

Ambot kaha og nagpakaaron-ingnon lang kini si Burdeus nga wala masayod sa kamatuoran nianang BMO. Posible usab nga mas midapig siya sa BMO ni Tomas, mao nga mipakanaog siya og "clarification" kalabot sa maong isyu. Maayo tingale nga i-document sa mga kapitan ang mga kalihukan nianang mga BMO.

Kay kun ang BMO officer namirma apan walay appointment isip opisyal sa gobiyerno, mahimo siyang pasakaan og kaso ubos sa Revised Penal Code kay nanapaw man kini sa trabaho sa usa ka opisyal sa gobiyerno.

Kun konsehal sa barangay ang BMO ug namirma og mga dokumento nga angay pirmahan sa kapitan, ang buhat niini usa ka "ultra vires" kun gawas na sa iyang gahum isip konsehal, ug mahimong mapasakaan og kasong penal ug administratiba.

Ang Association of Barangay Council maayong momata na og kinatulog sa pansitan aron idokumento ang kalihukan sa BMO, aron dili sila madudahan nga hadlok kaayo ni Tomas.