Unsa gyud ang tinuod?

Napatay o gipatay pagtuyo si Albuera, Leyte Mayor Rolando Espinosa Sr?

Kini ang pangutana sa mga nagpakabana sa kampanya batok sa gidiling drugas. Kaniadtong Sabado sa kaadlawon, napatay si Mayor Espinosa sa mga sakop sa PNP Criminal Investigation and Detection Group (CIDG)-Region 8 kay matud pa misukol kini dihang gipatuman ang search warrant batok kaniya tungod sa paghupot og armas.

Napatay usab sa CIDG 8 ang piniriso nga si Raul Yap nga apil sa giserbihan og search warrant tungod sa kasong paghupot og gidiling drugas. Si Yap giingon nga makagawas na unta sa prisohan sunod tuig.

Kun kamo ang pangutan-on, misukol kaha ang mayor? Si Mayor Espinosa mitahan sa iyang kaugalingon kang Heneral Bato Dela Rosa human manganli ni Presidente Duterte ang iyang pangalan nga protector sa gidiling drugas.

Ang mayor mitahan kay nahadlok nga patyon ug tungod niini gipapuyo siya sa heneral sa giestahan niining white house sulod sa Camp Crame. Dihang ang mayor mipauli sa Albuera, Leyte didto siya mipuyo sa police station kay nahadlok nga patyon. Human nga gipasakaan og kaso, dayon nalutsan og warrant of arrest, gibalhin siya sa Leyte Sub Provincial Jail sa Baybay City.

Base ning maong sirkumstansiya, mosukol ba ang mayor sa CIDG nga posible nga makapatay lang kaniya? Si Raul Yap giingon sa asawa niini nga makagawas na unta sa prisohan sunod tuig. Mosukol ba usab siya sa CIDG nga posible nga makapatay kaniya?

Ako nagtuo nga gituyo sa pagpatay si Mayor Espinosa tungod sa mga opisyal sa kapolisan ug politiko nga iyang gipangbulgar nga tigdawatan og salapi gikan sa anak niini nga gikonsiderar nga numero unong tigpayuhot og gidiling drugas sa Rehiyon 8. Si Raul Yap nadamay lang. Si Mayor Espinosa gipatay aron ang mga tawo nga iyang gilambigit sa operasyon sa ginadiling drugas malimpyo. Kay patay na ang mayor, wala nay makasaksi sa kaso.

Ang affidavit sa mayor nga nagtumbok sa mga personalidad sa gidiling drugas, dili na makabarug sa hukmanan kay wala nay makapamatuod niini. Mao ni ang rason nga siya gipatay.